ORANJESTAD – Diahuebs a tuma luga inauguracion di e prome Tech Lab na un scol basico, esta na Colegio Sagrado Curason. Prome Minister Evelyn Wever – Croes na e ocasion a tene un discurso den cual a reconoce esnan cu a realisa e proyecto aki y accentua e importancia di desaroyonan innovativo cerca nos muchanan. A traves di e bunita proyecto aki e muchanan lo siña tecnologianan y tendencianan nobo den educacion y nan lo tin e oportunidad pa ta creativo y explora nan imaginacion.
Diferente organisacion a colabora y contribui na e realisacion di e Tech Lab na Colegio Sagrado Curason. Prome Minister Wever – Croes durante di su discurso a expresa cu educacion di nos muchanan ta e fundeshi di nos futuro. Y pesey e ta un honor di por ta presente pa e lansamento di e proyecto innovativo aki.
Durante Immerse 2021, Jufrouw Nadia y Ruzischka (cu tabata bezig pa un tempo caba) a presenta nan soño pa crea un Tech Lab innovativo na Colegio Sagrado Curason. Un espacio creativo ekipa cu tecnologianan nobo den educacion pa stimula alumnonan pa siña mas di ciencia y tecnologia. Mirando e determinacion di e juffrouwnan aki, e compromiso di mayornan, di tur maestro, y tambe mirando tur e pasonan tuma caba pa haci esaki un realidad, a haya sa detayadamente kico e plan ta encera y con por yuda haci esaki un realidad.
Asina aki, a compromete na e proyecto, y atraves di Futura cu su proyectonan piloto enfocando riba innovacion den educacion, como Minister di Innovacion, nos a haci e proyecto aki un prioridad pa e aña 2022. Hunto cu ayudo di Futura, juffrouw Ruzischka y Nadia kendenan a lidera e diseño di e proyecto aki, a cuminsa acerca partners pa por haci nan vision un realidad. Loke tabata un soño e tempo ey na 2021, a bira un realidad awe exactamente un aña despues, Prome Minister Wever – Croes a expresa.
“E Tech Lab aki ta un ehempel cu por ehempel untiki verf, y hopi creatividad y determinacion, ningun soño ta mucho grandi pa por wordo realisa. Ofreciendo almunonan y docentenan un espacio cu lo trece nos educacion na e siguente nivel. Tambe como parti di ‘train the trainers’, maestronan atraves di e Tech Lab ye espacio aki, por explora tambe y comparti conocemento cu otro.”
Prome Minister Wever – Croes a sigui bisa, desde momento cu a drenta gobernacio a ripara cu tin un espacio grandi den e area di innovacion den gobierno, den nos sociedad y especialmente den nos scolnan. Den nos comunidad tin biaha nos mes ta resisti tecnologia, of cambionan. Tecnologia ta avansando na un nivel hopi rapido y e ta hunga un rol hopi primordial den e futuro desaroyo di nos pais. Nos muchanan lo bay traha trabounan cu ta rekeri habilidad nobo trahando cu tecnologianan avansa y cu porta no ta ni existi ainda. Aunke e ta un Futuro cu por ta mustra leu ainda, e ta mas cerka cu nos ta kere, pues mester cuminsa prepara nos generacion nobo pa trabou di futuro.
Prome Minister Wever – Croes a termina reconociendo un bes mas e trabou di cada uno cu a haci e proyecto aki posibel, esta henter e team super dinamico di Colegio Sagrado Curason y e team di Futura.
