Nationale Postcode Loterij (NPL) a caba di anuncia cu nan lo sigui apoya e actividadnan di Dutch Caribbean Nature Alliance (DCNA) dunando € 500,000 cada aña durante e proximo cinco añanan. DCNA lo uza e placa aki pa proyecto pa salvaguarda naturalesa den Caribe Hulandes door di yuda e Organisacionnan di Maneho di Area proteha na Aruba, Boneiro, Corsou, Saba, St. Eustatius y St. Maarten.
Desde selva tropical te na rif di coral, Caribe Hulandes ta contene un variedad amplio di habitat natural. E diverso ecosistemanan aki ta un magneet pa turista y, na mes momento, un di e fuentean di ingresonan mas importante pa Caribe Hulandes. E naturalesa di e islanan ta unico y importante, pero tambe fragil y menasa. Entre e menasanan mas importante tin desaroyo (di costa) mal regula, maneho di awa residual y maneho di sushedad, como tambe pastoreo excesivo y e impacto di especie invasor y cambio di clima.
“Nos islanan tropical unico y abundante, cu nan alta biodiversidad y abundancia di ecosistema y especie globalmente plama, ta exigi pa nos uni pa salvaguarda biodiversidad. Esey ta e curason di DCNA. Nos ta masha agradeci cu e apoyo di Loteria di Codigo Postal Hulandes y nos ta spera di continua yudando e Organisacionnan di Maneho di Area Proteha pa salvaguarda e tesoronan natural di Caribe Hulandes”, Hellen van der Wal, Presidente di DCNA a declara.
Tocante DCNA y NPL
DCNA ta un organisacion no lucrativo crea pa proteha entorno natural y pa promove maneho sostenibel di e recursonan natural, tanto riba tera como den lama, den e seis islanan di Caribe Hulandes. E mision di DCNA ta pa salvaguarda naturalesa den Caribe Hulandes yudando y sistiendo e Organisacionnan di Maneho di Area Proteha. Door di crea un voz uni, yuda sigura un financiamento sostenibel, comparti recurso, habilidad y experiencia y promove divulgacion educativo y consciencia publico, DCNA por fortalece e red y por apoya e iniciativanan di conservacion di naturalesa den henter Caribe Hulandes.
DCNA tin mas di un decada di historia cu NPL y su actonan di caridad of “Goede Doelen”. Desde 2008, DCNA a convirti den beneficiario completo di NPL y ta ricibi un subsidio cada aña.
Reunion exitoso di evaluacion entre DCNA y NPL na mei di aña 2022. Di robes pa drechi: Sra. Esmee van der Ven, ex gerente di organisacion benefica di NPL, presidenta di DCNA, Dr. mr. Hellen van der Wal, secretario di DCNA, Sr. Kai Wulf, ex director di DCNA, Sr. Tadzio Bervoets y director di organisacion benefica di NPL, Sr. Jonne Arnoldusse N.