Minister Geoffrey Wever den Parlamento di Aruba pa presenta e modernisacion di maneho di permiso di negoshi

Entrante 1 october 2022 e maneho nobo di permiso di negoshi “Vestigingsbeleid 2022” a drenta na vigor. E maneho nobo ta modernisa y completamente digitalisa brindando un miho servicio na e clientenan, eliminando red-tape y aportando na desaroyo economico di Aruba.
Diahuebs 26 october Minister Wever tabata den Parlamento di Aruba pa presenta e Vestigingsbeleid 2022 y contesta preguntanan cu por tin tocante esaki.
Minister Wever a elabora riba e cambionan principal den e Vestigingsbeleid 2022, cual ta:
Reduccion di “red-tape” door di elimina rekisito pidi y cu permiso di cliente consulta Censo y KvK pa informacion necesario;
Digitalisacion completo di e servicio unda e cliente por “track” e proceso di peticion di permiso y download su permiso;
Ampliacion di categoria di persona cu no mester pidi un permiso mas incluyendo tambe persona no naci na Aruba, di cual un di su mayornan ta naci na Aruba y tin nacionalidad Hulandes y persona no naci na Aruba, cu ta casa of tin un geregistreerd partnerschap cu un local y cu tin un verklaring van rechtswege;
Estimulo di inversion den centro di Oranjestad y San Nicolas convertiendo e centronan aki den centro di vivienda, negoshi, gastronomia y cultura;
Stimula diversificacion di Aruba su economia atraves di e “six promising sectors”;
Posibilidad pa companianan chikito pa establece den nan cas (zona residencial) asina bahando e cost of doing business; y introduccion pa prome biaha di principionan di sostenibilidad den e maneho di permiso.
E reunion cu Parlamento di Aruba tabata uno fructifero. Parlamentarionan a haci pregunta riba entre otro eliminacion di red-tape, sistema digital, one-stop-shop, clima di inversion y termino di procesa peticion.
“Mi ta contento cu e oportunidad brinda door di Parlamento di Aruba pa presenta e Vestigingsbeleid 2022 y mi kier subraya cu e modernisacion di e maneho di permiso di negoshi ta un condicion necesario pa progreso economico di Aruba cual lo beneficia henter pueblo di Aruba door di stimula mas negoshi pa habri na Aruba y asina crece Aruba su economia y crea inversion, cuponan di trabou nobo, “spin-off” economico y aumento di entrada pa caha di gobierno”, Minister Wever ta comenta.