ORANJESTAD: En conexion cu dia Nacional contra Traficacion di Hende, Minister Endy Croes hunto cu Prome Minister Evelyn Wever – Croes a presencia lansamento di e pakete educacional tocante Traficacion y Contrabanda di Hende, “Lespakket Mensensmokkel Mensenhandel”. E ta un pakete special pa studiantenan di scol secundario entre 12 pa 18 aña cu ta duna informacion tocante traficacion y contrabanda di hende. Ta importante pa hobennan ta alerta pa señalnan di posibel traficacion y/of contrabanda di hende sea pa nan mes of esnan cerca di nan tanto na Aruba como den exterior. E “lespakket” ta un prome paso den crea mas conscientisacion cerca nos hoben studiantenan. Haciendo uzo di e informacion inclui den e pakete, lo stimula debatenan sano riba e topico aki y asina crea e conocemento necesario pa atende cu e problematica, den un ambiente educativo. E pakete educacional cu a wordo presenta no solamente dirigi pa studiantenan di e educacion secundario, pero tambe dirigi pa e docentenan y trahador/coordinador social. E campaña ta pa conscientisa e pueblo di Aruba tocante e problematica aki, cu ta tuma luga na Aruba tambe.
Durante lansamento sra. Jeannette Richardson y Minister President a hiba un discurso. Minster Endy Croes a hiba palabra den nomber di colega Minister Rocco Tjon, kende tabata den exterior pa trabou.
E mandatario a indica di ta contento principalmente Coördinatie Centrum Mensenhandel Mensensmokkel Aruba (CMMA) y Ketenmanager Venezuela (KMVEN) a traha e pakete educacional como parti di e programa di conscientisacion ‘Habri bo wowo’. Si scolnan den educacion secundario por duna e pakete minimal un biaha den e añanan cu e studiantenan ta cerca nan, nos por tin confiansa cu tur studiantenan den edad di 12-18 aña tin e conocemento basico pa reconoce traficacion di hende, pa proteha nan mes contra traficacion di hende y con nan por haya ayudo pa nan mes of otronan. Minister Endy Croes ta gradici e scolnan cu ta forma parti di e proyecto piloto y lo bai uza e pakete educacional.
Concluyendo Minister Endy Croes a termina cu palabranan di gradicimento y felicitacion na un y tur cu a haci esaki e proyecto piloto posibel, principalmente CMMA y KMVEN.