ORANJESTAD: Siman pasa riba invitacion di mandatario di Deporte, sr. Kurt Johnson di Total Venue Concepts; un profesional den preparacion di pista di “drag racing” na Merca tabata cuater dia na Aruba. Sr. Johnson den su carera a atende cu hopi pista di drag race rond mundo y tin conocemento y experticio amplio pa evalua, midi, bora, analisa pista y duna un rapport final. Sr. Johnson a bishita e pista di Palo Marga hunto cu miembro di ABM y representante di Ministerio di Deporte unda a analisa kico tur tin cu wordo haci pa e pista por wordo certifica. Sr. Johnson a reuni cu e mandatario di Deporte unda e la duna presentacion preliminar di e rapport. Durante su estadia sr. Johnson a reuni cu companianan na Aruba cu tin ekiponan cu por ehecuta e trabou asina cu tin e fondonan disponibel. E rapport final ta wordo entrega e siman aki na Ministerio di Deporte. Finalisando Minister Endy Croes a expresa cu ohala pronto e pista por wordo drecha y aproba pa instancianan internacional. Pa e coredonan di drag race por tin un pista cu ta cuadra cu tur specificacionnan di IHRA y NHRA pa caredanan internacional y nacional por tuma luga riba pista di International Raceway Park Palo Marga na un manera mas safe posibel.
