Oranjestad – Como parti di un accion di recorte, FSMA Respaldo lo cera entrante 1 november e departamento di estadia (Verblijf). E motibo principal pa esaki ta cu Respaldo ta enfoca su mes riba cuido di salud mental specialisa (Specialistische GGz), y e funcion residencial cu e departamento aki tin no ta forma parti di esaki. No obstante, Respaldo lo sigui brinda e cuido (specialisa) necesario pa e grupo di cliente aki.
A comparti e informacion aki cu e clientenan y nan famia desde juli di e aña aki caba.
E departamento di estadia (Verblijf) ta forma parti di e Clinica Respaldo (antes conoci como PAAZ). E departamento aki tin capacidad maximo pa 21 cliente. Mayoria cliente ta vulnerabel y debi na nan trastorno/enfermedad combina cu nan capacidad financiero limita, tin poco perspectiva pa biba independiente. Aparte di provee e cuido specialisa, e departamento aki tin tambe un funcion residencial pa e clientenan aki. Sinembargo, pa e calidad di bida general ta mas sano pa laga e grupo di cliente aki biba mas integra den sociedad, en bes di den un ambiente di hospital. Den pasado a purba dos biaha caba pa efectua e cambio caba (na 2019 y tambe den tempo di PAAZ), pero lastimamente sin exito.
Desaroyonan recien na Aruba den area di cuido di salud mental a conduci cu e cuido di salud mental ta dividi den cuido di salud mental basico (Basis GGz) y cuido di salud mental specialisa (Specialistische GGz). Fundacion Hunto, cu recientemente ta estableci, lo centra su mes riba GGz basico, y Respaldo lo ofrece su servicio medico den e GGz specialisa.
E servicio di residencia pa e grupo di cliente di estadia (Verblijf) no ta cay bou di e servicio medico specialisa, pero mas bien bou di un residencia protehi (beschermd woonvorm).
Banda di e desaroyonan aki tin e necesidad pa haci recorte substancial na Respaldo. Entre otro, e reduccion di e 5.5% cu Land Aruba a impone via AZV riba tur proveedo di cuido medico, e caso di Apelacion cu Respaldo a perde recientemente contra AZV, e necesidad pa paga e debe actual na Dr. Horacio Oduber Hospital lihe y inflacion, a conduci cu Respaldo mester reorganisa na un manera responsabel y corta gasto pa keda financieramente sano.
E ultimo dos añanan internamente ya a tuma diferente medida cu e meta pa economisa: a corta riba personal, a corta riba condicion di trabou primario y secundario y no a yena vacaturanan pa personal medico. Ademas, a corta riba training, huur y riba diferente gasto di maneho general.
E ceramento di e departamento residencial aki lo conduci na un recorte y uzo mas eficiente di recurso. Recurso cu por uza pa engrandece e acceso na Respaldo como proveedor di cuido di salud mental specialisa.
Desde maart 2022 Respaldo ta den dialogo cu gobierno y AZV tocante e asunto aki y desde juli a envolve e clientenan y nan famia. Respaldo ta consciente cu esaki ta un decision drastico pa tanto e cliente como pa su famia, pasobra despues di prome di november, pa hopi caso lo no tin un luga adecua di biba disponibel ainda. E famianan a wordo informa cu Gobierno ta na altura di e situacion aki y cu Minister encarga ta bezig pa yega na un solucion adecua.
Desde e tempo ey Respaldo a keda den contacto cu e clientenan y nan famia regularmente na manera consultativo pa busca otro posibilidad residencial provisional pa cada cliente. E famianan tin y ta sinti un responsabilidad pisa pa cu esaki, locual siguramente no ta subestima. No obstante, mayoria di cliente cu ta bay bandona e departamento Verblijf a wordo registra cerca e FACT-team di Respaldo, cu ta ofrece cuido specialisa ambulatorio, pues ta bai na unda e cliente mes ta residencia.
Pa tene e departamento residencial habri te dia di awe tabatin efecto negativo riba e servicio di cuido pa Aruba. Debi na falta di personal door cu no a yena vacatura na e departamentonan pa cuido urgente, e cantidad di luga pa admision urgente ta severamente limita. Pues, mester tene na consideracion e riesgonan di siguridad asocia pa e cliente mes, e co-cliente, como tambe e personal. Esaki kiermen cu ciudadanonan cu un necesidad di cuido agudo/urgente y tin biaha cu por ta peligroso, no semper por keda admiti. Respaldo ta conciente cu e incapacidad di no por admiti e casonan urgente tambe por causa peliger pa e siguridad den nos sociedad.
Teniendo cuenta cu tur e argumentonan menciona ariba, encuanto e organisacion di e cuido di salud mental completo na Aruba y tambe e necesidad pa soluciona e situacion financiero urgente, Respaldo no ta wak niun otro solucion cu pa cera e departamento di Verblijf.. Esaki pa garantisa e existencia continuo di Respaldo y e cuido specialisa di salud mental pa Aruba.
Dr. Hendrikus van Gaalen
Presidente Hunta Directiva
FSMA Respaldo