Minister Glenbert Croes PRONTO ARUBA LO BENEFICIA DI LOCUAL A LOGRA NA ECUADOR

Recientemente Minister Glenbert Croes a biaha pa Ecuador en busca di un solucion cu lo transmiti den un reduccion di awa y coriente pa nos pueblo.

E mision pa Ecuador ta pa haya e oportunidad pa cumpra HFO conforme specificacion- y exigencianan di WEB pero na un prijs mas barata. E meta aki a wordo logra cu e mandatario su bishita pa Ecuador. Ta bon si pa informa nos pueblo cu ya pa 3 aña caba como 50% di e HFO cu Aruba ta cumpra ta di Ecuador. E otro 50% ta bin for di Colombia, Puerto Rico y Merca. Pero e compra aki tabata pasa via 2 intermediario. Pero awor Minister Glenbert Croes a logra pa di Pais pa Pais, Gobierno pa Gobierno, PetroEcuador pa RDA/FMSA, e compra ta directo pa nos pais. Esaki ya ta resulta den un descuento substancial.

Pero e biahe aki tabata exitoso y sumamente beneficioso pa Aruba pa mas di un motibo. Manera e mandatario a expresa den su rueda di prensa, el a bay Ecuador cu e mision di por haya HFO na un prijs mas barata cu lo beneficia nos pueblo, pero e biahe a duna mas resultado.

Logronan:

1. HFO mas barata conforme specificacionnan cu RDA, WEB y ARUBA ta exigi.
2. A surgi e proposicion pa Flotas Petroleras de Ecuador esta FLOPEC, uza Aruba como su hub pa su flota, pa almacena su producto den e tankinan di RDA y pa distribui esaki for di Aruba. E actividadnan aki ademas di genera entrada pa RDA/FMSA, lo genera trabou tambe.
3. PetroEcuador, ta e compania nacional di petroleo di Ecuador. E mandatario a keda sumamente impresiona pa e cantidad extraccion y produccion di petroleo cu tin na e pais aki, cual crudo por ta disponible pa e reactivacion di e refineria di Aruba den su fase di transicion pa gas y finalmente pa hidrogeno.

Proximamente un delegacion di RDA y FMSA lo biaha pa Ecuador pa caba di negocia y concretisa e logro aki. Pero e mandatario no ta perde speransa cu Merca lo aproba pa Aruba por busca petroleo directamente for di Venezuela tamb, cual lo resulta sumamente bentahoso pa nos pueblo. Finalmente ta pa esey nos ta hacie. Pa nos pueblo por haya e alivio den su cuenta di awa y coriente.