“Recibonan dobel di awa y coriente, pago pa remedi, costo di bida impagabel ta locual ta asotando nos hogarnan e momentonan aki. E “aanwijzing” no a yega na Cocolishi, pero realidad di e maneho di Gabinete Evelyne Wever Croes ta destrozando e base di un existencia husto den bida di nos hendenan. E “aanwijzing” ta yegando manera un realidad amargo den hogarnan di nos conciudadanonan”. Esaki ta reaccion di e Lider di AVP mr. Mike Eman riba e expresion di jubilo di Gabinete Wever Croes cu nan no a haya un “aanwijzing”.
GOBIERNO Y COALICION TA
SORDO Y SIEGO PA DOLOR DI PUEBLO
Nunca antes den historia di Aruba nos pueblo a worde asina maltrata pa un gobierno. E medidanan di Gabinete Wever Croes ta cruel y sin mesericordia. Den tur skina di Aruba nos ta tende gritonan di auxilio, e Lider di AVP mr. Mike Eman ta expresa. Ta Ministernan di Gabinete Wever -Croes y e 11 parlamentarionan di MEP-RAIZ so no ta scucha nan.
Tur esaki ta bini riba un aumento barbaro caba di costo di bida. Ariba esaki ta bini awor e aumento di BBO y pagamento pa remedi.
Eman ta bisa cu famianan na Aruba ta haya nan mes mas y mas confronta cu un pobresa creciente y alarmante. Costo di bida y gastonan pa subsistencia di un famia a conoce un aumento dramatico. Medidanan cu Gabinete Wever-Croes a implementa durante e ultimo añanan a impacta e cifra di inflacion severamente.
PREOCUPACION DI CAFT Y RAAAD VAN ADVIES
NO TA E PREOCUPOACION DI HULANDA
CAFT ta adverti cu Gabinete Wever Croes ta busca e solucion den saco di pueblo cu aumento di belasting envez di corta den e gastonan excesivo: de noodzakelijke lastenverlagingen worden onvoldoende opgepakt en dekking wordt te veel gevonden in het verhogen van de belastingen. Raad van advies ta bisa cu Gabinete Wever Croes ta crea un cantidad di diensten y raden nobo cu nan no ta mira nan hustificacion. Esaki ta unda mas di 40 miyon extra ta bai di goedren en diensten y ta apunta “Friends & Family”. E hecho cu Gabinete Wever Croes ta busca e placa pa paga pa esaki for di saco di pueblo por ta un preocupacion di CAFT y Raad van Advies, pero no pa Hulanda. Pa Hulanda e bottomline di e presupuesto ta conta, e bottomline di pueblo no ta nan preocupacion. Esey ta e pueblo mes mester dicidi si esaki ta e prioridad cu nan ta desea.
SOLO EL PUEBLO SALVA EL PUEBLO
Den cierto sentido Hulanda tin rason. Nan ta controla e cifra final di presupuesto. Si e gobierno ta escohe pa masacra e pueblo pa haya entrada pa paga pa su malgastamento di placa ta na e pueblo di Aruba pa dicidi si kier sigui soporta e forma di gobernacion aki. “Si na Aruba famianan tin cu escohe entre paga pa recibo di coriente of pone cuminda riba mesa. Si den pueblo esnan mas vulnerabel mester escohe entre paga pa remedi of alimenta nan jiunan manera debe ser”, esakinan no ta cos cu nan ta wak na Den Haag. E bottomline di prespuesto nan ta wak, e bottomline di pueblo ta nos mester defende”, e Lider di AVP mr. Mike Eman a envatisa. E ta agrega: “mas cu un vez nos a comparti den barionan cu no ta responsabilidad di Hulanda pa bin libra Aruba di e Gabinete Wever Croes, pero “solo el pueblo salva el pueblo”.