Prome y durante nos entrada di MEP como politiconan nobo nos a wordo instrui cu e plataforma ta pone enfasis riba transparencia, integridad y virtudnan moral importante. Alaves nos a wordo informa cu si toch nos ta dicidi pa desvia di e norma y balornan aki, y cualkier persona hay’e den problema cu husticia pa via di esaki, esakinan lo mester sinta riba nan mesun blaar. Algo cu sigur ami ta kere den dje y ta para pe. Ta pesey ora cu informacionnan a cuminsa drenta cu algo no ta bon na Aruba Huis, Minister President Evelyn Wever-Croes a dicidi di habri un investigacion mesora. Esaki a wordo informa na Parlamento y ta algo cu a wordo comunica publicamente, pasobra nos partido no ta para pa nada cu ta atacha integridad ni bon gobernacion. E ta e seriedad aki cu ta haci cu mi por papia y skirbi di e investigacion aki pasobra transparencia y integridad semper lo keda un prioridad pa nos fraccion.
E investigacion andante
Ta pa e motibo aki e investigacion di CAD ta andando y ta den su fasenan final. No por bisa exactamente pa ki tempo e ta keda cla pa asina e investigacion por cana trankilamente manera tur otro caso. Tur detaye di e caso ta hermeticamente cera pa un bon desaroyo di e caso y pe caso no wordo stroba. Apesar di e weganan politico cu kier pone presion riba gobierno y kier punta dede riba Minister President, oposicion mas cu tur otro hende sa masha bon cuanto un investigacion di un caso por dura. Specialmente ora ta papia di Marisol Lopez-Tromp, cu ta bao investigacion di e caso di Kukwisa, cu aworaki sa masha bon si e ta un sospechoso si of no. Un caso di abuso cu otorgamento di tereno pa cual su nomber tambe a aparece. Un caso cu tambe ta tumando su tempo y cu pueblo mester warda cu pasenshi pa wak kico ta bay sosode. Marisol a wordo interoga na varios ocasion y e ultimo biaha esaki a dura 7 ora na landsrecheche pa bebe coffee. Tambe Marisol a wordo yama pa Allan Howell pa declara den e caso Diamante, ainda pueblo ta puntra ta kico esaki exactamente kiermen pa Marisol.
Detayenan di maneho di partido AVP cu su casonan di corupcion
Por mira claramente e diferencia entre e principionan y maneho con AVP ta trata casonan di corupcion y investigacion. Manera un candidato di AVP ta cay bao investigacion y ta haye cu problema cu husticia, por wak con Mike Eman y AVP ta purba cuminsa menasa OM, PG, Polis, Landsrecherche y profesionalnan den rueda di prensa, articulo y otro medionan social cu nan no ta sirbi, cu nan ta politiek verziekt y ta tira nan tur bao bus. Nan a yega di cambia ley pa faborece esnan cu ta bao investigacion. Dowers ta declara cu Minister President mester baha cu e investigacion di Aruba Huis. Acaso Mike Eman y Dowers cu tabata minister di Husticia a baha den caso IBIS? Acaso Mike Eman a baha como lider di AVP y Dowers como parlamentario ora cu Benito a bay KIA? Cual ta e pasonan cu Mike y Dowers a tuma den caso IBIS y Avestruz? Dicon Dowers no a baha como minister di enseñansa ora Benito y Mike a kita e Proyecto di Havo/Vwo for di dje pa traha e tram fracasa cu a destrui negoshinan den caya grandi? Unda Dowers tabata pa defende enseñansa? Mike Eman, Dowers y parlamentarionan a apoya Benito, nan lo baha si Benito lo wordo haya culpabel? Ban wak!
Si pueblo desea mas informacion di e articulo aki, contact mi na tel: 528-4639 of email mi na: [email protected] / Bo parlamentario y sirbidor di pueblo na bo ordo semper!