Diahuebs 13 di october nos tabatin un un encuentro publico den sala di parlamento unda nos a trata e topico di Landpakket. Mas cu claro mi a haci uzo di e oportunidad pa gradici full e team cu tabata tey presente y tur esnan cu ta forma parti di team completo cu ta bezig cu e 8 temanan di Landspakket.
Manera a keda indica na inicio di e reunion, e team completo ta trahando riba mas cu 60 accion relaciona cu diferente reformanan cu ta den preparacion simultaneamente.Un ehercicio hopi grandi, importante y bou di condicionnan hopi exigente, sin lubida e falta di capacidad cual ta haci cu hopi trabou ta cay riba e mesun expertonan. Mas aun nos expertonan cu ta haci tur esakinan banda di nan trabou diario. Pesey mes mi ta haya un gradicimento y felicitacion tawata mas cu na su lugar.
Tambe mi a gradici nan pa e splicacion general cu a keda duna durante e encuentro publico aki y a haci un invitacion pa cada comision separadamente bin duna un presentacion mas detaya den comision den parlamento. Mi a indica cu mi ta haya hopi bon cu nan ta cuminsa incorpora parlamento mas concretamente den e proceso door di manda pidi “schriftelijke zienswijze” encuanto cierto topico y ley. Esaki ta algo cu mi ta desea pa nan sigui haci y pues dibiaha a tuma e oportunidad durante e encuentro pa a haci un apelacion na e expertonan pa continua cu e procedura aki.
Por ultimo mi a pidi atencion special pa e proceso rond di Consensus Rijkswet. Pa nan tene debido cuenta cu e rol di Parlamento den e esaki. Sigur un reunion hopi interesante y importante caminda pueblo por a sera conoci cu algun di e profesionalnan y expertonan cu ta trahando riba e landspakket. Aruba por ta orguyoso cu e grupo aki cu ta trahando incansablemente.