Entrada Hudicial na un cas na Pos Chikito, den cual un homber y un muher a wordo deteni como sospechoso di varios atraco arma basta violento y tambe e duo aki a comete varios kiebro y ladronicia, diasabra marduga nan number a hunga.
Pos Chikito: Diasabra den careda di 4’or y mey di marduga, team di aresto a drenta un cas na Pos Chikito y a detene un homber y un muhe ambos ta wordo sospecha di varios atraconan arma violento y tambe varios kiebro y ladronicia.
Segun nos a compronde e Suzuki Swift blanco na varios ocasion a wordo usa pa comete atraconan, entre otro diasabra siman pasa, na momento cu e duo a drenta un cas den Macubaristraat y a la estilo Bonny & Clyde a comete un atraco arma hopi violento. Nan a mara e habitantenan di e cas cu tie wraps y a pone arma di candela na nan cabes, traumando e habitantenan di e cas. E atracadonan lo a bandona e sitio den e Suzuki Swift Blanco, e auto aki a wordo haya na e cas na Pos Chikito tambe.
E team di aresto, atraco team, team di Recherche, K9 unit a asisti na e entrada hudicial aki y te den oranan di mainta autoridad tabata haciendo investigacion na e cas. Aki nan a confisca varios arma di candela y articulonan cu nan a usa pa comete e atraconan.
Un tremendo trabou di e team di polis, cu hopi lihe a logra pone man riba e duo Bonny & Clyde aki y asina stop di sigui comete mas atraco y ladronicia.
CUERPO POLICIAL TA INFORMA:
Atracoteam a detene un pareha sospecha di a comete ultimo atraconan.
Awe madruga Atracoteam a haci un entrada hudicial na un na cas na Pos Chiquito. A logra detene e muhe L. I. A. P. naci na Aruba 23 aña y e homber A.M.B. naci na Aruba di 25 aña. Ambos ta wordo sospecha di a comete of tawata envolvi den e ultimo atraconan y tambe kiebronan den diferente lugar. A hasi uso di arrestatie team pa detene e sospechosonan aki. Atracoteam tambe a wordo asisti door di diferente coleganan di recherche (DAR) y K9 Unit.Na e cas a confisca un revolver, atributonan usa pa comete y comunica durante e atraconan.
Pa Cuerpo Policial por resolve mas caso cooperacion di pueblo di Aruba ta hopi importante pesey ta pidi si bo tin cualkier informacion jama tiplijn di tiplijn 11141.
