Minister Glenbert Croes ta hayando reaccion di consumidornan cu a conoce un aumento di 100% den nan cuenta mensual di awa y coriente.
Nos tur sa cu e aumento anuncia no tabata di 100% pero mas bien un averahe di 24%.
Clientenan cu a haya un cuenta notablemente hopi mas halto cu e aumento temporario introduci, mester acudi inmediatamente na WEB y/of ELMAR unda nan cuenta lo ser atendi cu e atencion y comprension debido.
Utilities cu ta e compania di Gobierno cu ta doño di WEB Y ELMAR ya a transmiti e peticion aki di Gobierno na nos companianan estatal.
Nos tur ta altanto y nos pueblo conciente cu prijs di petroleo ta halto y ta aumentando pa dos factor: 1. E guera entre Rusia y Ukrania 2. Pa e paro di produccion di petroleo cu Paisnan OPEC (cu ta produci petroleo) a introduci cu e meta pa e prijs di crudo sigui aumenta cu 3. pronto lo por causa un recesion mundial.
Minister Glenbert Croes di su banda ta haciendo su maximo esfuerso pa por haya HFO cumpra na un prijs mas barata pa finalmente transmiti e reduccion aki pa nos pueblo.
PA TUR PROBLEMA MESTER BUSCA SOLUCION
Y apesar cu tin un campaña formal contra di e mandatario su empeño y esfuerso, e ta sigui convenci y determina den su mision. Pa tur problema mester busca e solucion. No por keda sinta man cruza sin haci nada.
LO CUMPLI CU E EXIGENCIANAN DI ARUBA
Determina e mandatario ta biaha proximamente pa Ecuador den su mision di haya crudo na un prijs mas ventahoso cu ta cumpli cu e rekesito- y specificacionnan cu Aruba ta exigi.
Manera e mandatario a expresa: “Nos NO ta tuma e situacion aki pa venci. Ora cu tin bon intencion lo insuperable ta bira superable pa finalmente nos trece alivio pa nos hendenan cu ta pasando den momentonan duro y dificil. Esey ta nos mision.”