Dia 11 di october ta recorda cu 20 aña pasa a yega na un acuerdo na Italia pa loke ta e debenan di garantianan hotelero di 206 miyon dollar crea pa e gobierno di AVP durante 1986-1988.
Hecho ta cu contra tur conseho di Banco Central, IMF, Pannell Kerr & Forster y World Bank pa no redobla e cantidad di cambernan di hotel y esaki debi na e limitacion di nos infrastuctura, Gabinete Henny Eman I a dicidi toch di duna garantianan den forma descabeya na e Mafianan Italiano (Spartaco Ghini) y esaki relaciona cu e tres proyectonan hotelero Beta, Ramada y Plantation cualnan tur a fracasa y laga den ruina atras.
Reduccion di debe cu casi $100 miyon
E debe di 206 miyon dollar aki Gabinete Oduber a hereda na momento di drenta gobierno na final di 2001 y esaki a base di un sentencia di Corte Internacional na Den Haag y cual debe mester a ser paga inmediatamente (‘uitvoerbaar bij voorraad’) na e compania SACE.
Tabata danki na e curashi y determinacion di nos ex-ministernan Nelson Oduber y Nilo Swaen, kendenan no a perde pa gana y cu urgencia a bay Italia, caminda nan a yega na un acuerdo cu SACE pa reduci e debe di 206 miyon dollar te 110 miyon dollar y di cual 55 miyon dollar mester a wordo paga cash na maart 2003 y e restante durante 15 aña largo na un suma di 5.1 miyon dollar pa aña y cual e ultimo pago a tuma lugar dia 31 di maart 2018. Tur esaki debi na un gobernacion iresponsabel di aventureronan, cu manera ex-Minister Hulandes Jan de Koning (dfm) a yega di declara, cu e garantianan a wordo regla door di ex-Premier Henny Eman ‘onder een kopje koffie’ cu e Italianonan. Ta fresco den nos memoria ainda con e ex Minister di Finanzas Tico Croes a declara e tempo ey cu e garantianan lo no costa Aruba nada y cu su persona lo lora manga di camisa y bay cu spada den man pa enfrenta e Italianonan.
Aventuranan di mas grandi di siglo
Cu firmamento di e acuerdo na Italia dia 11 di october 2002 a yega un fin tambe na loke ta bay den historia como e aventura di mas grandi di siglo pasa, esta e dealnan mafioso cu a wordo cera cu e Italianonan di parti di gobernantenan di AVP. Pero cu esaki e pesadiya no a termina ainda ya cu despues di e ultimo pago di e garantianan hotelero na maart 2018, entrante e mesun aña aki e pueblo a conoce un otro aventura di mas grandi di siglo, esta tur e debenan di e proyectonan PPP (Hospital, Green Corridor, Watty Vos Boulevard, MFAnan) cu mester ser paga na un suma di 85 miyon florin pa aña y durante 29 aña largo. Y tur e debenan nobo aki – fuera di e megadebe mes – a wordo crea pa e ruman chikito di Henny, esta Mike Eman y su partido AVP.
Sin duda cu e ex-ministronan Nelson Oduber y Nilo Swaen a haci un tremendo trabao 20 aña pasa ya cu nan a logra trece solucion definitivo pa e garantianan hotelero y a scapa Aruba di un pago di casi 100 miyon dollar na e Italianonan di SACE.
