Diabierna ultimo nos a celebra 103 aña di Royal Dutch Airlines KLM. E dia memorabel aki KLM ta celebra tradicionalmente cu presentacion di un Delfts Blauw Huisje. E aña aki KLM a scoge cas Ecury, unda Museo Arkeologico ta situa actualmente, como nan KLM-huisje #103.
Cas Ecury ta un monumento hopi importante y special aki na Aruba. Cas Ecury tabata cas di famia Ecury, un famia importante y conoci riba nos isla. Un famia di comerciante. Alabes durante e anochi a duna atencion na e echo cu Boy Ecury, heroe durante Segunda Guerra Mundial, ta descendiente di e famia aki.
Mi kier a subraya palabranan di nos Minister President Evelyn Wever-Croes durante e anochi aki caminda el a gradici KLM pa e cooperacion di semper, como partner importante den nos turismo. El a enfatisa cu durante pandemia nan a sigui bula pa trece medicamento, vacuna y personal den cuido. Alabes e la gradici KLM pa conecta nos cu nos cu nos yiunan cu ta studia na Hulanda. KLM enberdad ta hunga un rol hopi importante pa nos pais y hendenan.
Mi ta sigur cu Delft Blue huisje#103 lo genera hopi interes den Aruba y tambe pa nos museo. E video traha special pa su presentacion sigur ta imprecionante. Spera cu hopi hende rond mundo gosa di dje y keda incentiva pa bin bishita nos dushi isla. Un danki di curason na tur cu a haci esaki posibel, specialmente na ATA, AAA, Monumentenfonds y KLM. Pabien pa un anochi espectacular.
