Partido MEP a tuma nota di fayecimento recien di un gran baluarte Arubano, esta sr. Sylvester Mylles Vrolijk, miho conoci como Siro of Sylvio.
Siro a nace na Aruba dia 31 december 1938 y a fayece dia 25 di september 2022.
Despues di termina su HBA-A na Sint Canisius College na Nijmegen Hulanda, Siro a sigui su estudio na Rijkshogeschool voor Tropisch Landbouw na Deventer.
Na Aruba Siro a cuminsa su carera na Servicio Veterinario for di 1 januari 1962 te cu 31 december 1975 den funcion di Manager proyecto reforestacion Aruba Mira Lamar.
For di 1 di januari 1976 te cu 31 di december 1998 Siro a fungi como Hoofd van Dienst Landbouw, Veeteelt en Visserij na Santa Rosa. Y for di 1 di januari 1999 te cu 31 di december 1999 como Hoofd van Dienst, arbeidscontractant.
Despues di un trayectorio di 37 aña como empleado publico Siro a baha cu pensioen bon mereci dia 31 december 1999.
Sin duda cu Siro como un persona bon capacita tabata e persona clave y di confiansa di diputado Daniel Leo (dfm) na fundacion di Dienst Landouw, Veeteelt en Visserij, Santa Rosa y pa guia e departamento tan importante aki pa nos isla, tanto pa loke ta agricultura, cria y pesca.
Partido MEP ta desea su señora esposa, yiunan, nietonan, rumannan y demas famia hopi forsa y cu Siro sosega na paz den brasa di Señor.