Oranjestad – Diasabra marduga den careda di 12:30 na un night club situa den Weststraat un persona a wordo herida na su cabes.
E problema lo a start momento cu security lo a bay of a saca un persona for di e establecimiento.
Aparentemente e persona aki lo no a gusta y a dal e security cu un obheto den su cabes, cortando e seriamente.
Durante cu polisnan tawata yegando e sitio nan a mira un auto sali cu velocidad halto y mesora nan a sigui esaki, unda cu a start un persecusion cortico.
Tawata trata di un Toyota Vitz color cora cu a drenta Visstraat bay ariba den verboden. Saliendo altura di Kowloon e ta dal contra auto di polis y ta stop.
Eynan polis ta detene tres ocupante, dos homber y un muhe.
Tur a wordo hiba warda di polis na Playa. Departamento di trafico mester a presenta na sitio unda cu despues a laga takel e auto y hibe Santa Cruz.
Ambulance a presenta na e night club unda cu mester a transporta e persona herida pa Hospitaal.
