“Wingo ta un socio importante y valioso pa e aeropuerto di Aruba. Y nos ta contento cu e vuelo adicional pa y for di Medellin, como un porta nobo di entrada pa Colombia. E slogan di Wingo ta asi se vuela! Pa nos di Aruba Airport Authority, nos por cambia e slogan den Asi se vuela y se expande horizontes! Felicidades Wingo”, asina Barbara Brown, Chief Commercial Officer di Aruba Airport Authority a bisa na ocacion di celebracion di e vuelo directo for di Medellin pa Aruba.
E evento a tuma luga diaranson atardi, ora e avion a yega Aruba yena di turista y tabata cla pa sali bek cu un cantidad di Arubiano cu ta prefera Medellin awendia pa pasa vakantie, haci compras of pa haci un check-up medico. Na aeropuerto tabata presente Minister di Turismo, Dangui Oduber, Minister di Transporte, Ursell Arends, gerencia di Wingo, gerencia di Aruba Airport Authority y representantenan di Aruba Tourism Authority.
Dos biaha pa siman
Desde e siman aki, e aeroliña Wingo di Colombia a start cu dos vuelo adicional pa siman, pero e biaha aki for di Medellin. E vuelonan lo ta riba diaranson y diasabra, cu nan avion B737-800 cu capacidad di 189 asiento. Riba diaranson e vuelo ta sali 2:18 pm for di Medellin. E buelo di regreso ta sali 5:56 pm for di Aruba. Riba diasabra e vuelo ta sali 10:08 am for di Medellin, yegando Aruba 1:08 pm. E vuelo di regreso ta sali 1:46 pm for di Aruba y yega Medellin pa 2:30 pm. Esaki ta traduci den aproximadamente 1500 asiento adicional pa/for di Aruba. Cu e servicio adicional desde october 2022, Wingo ta opera awo en total cinco (5) vuelo semanal for di Colombia, cu ta tres (3) for di Bogota y dos (2) for di Medellin.
Medellin ta den demanda
Te cu recien, e ruta directo pa Medellin ta wordo ofreci solamente door di Sarpa Airlines, cu tres vuelo semanal. Esaki ta nifica cu Aeropuerto Internacional Reina Beatrix (AUA Airport) awor tin 5 vuelo semanal nonstop pa/for di Medellin, cu ta yega na 500 asiento pa y for di Medellin tur siman.
Tocante Wingo
A funda Aero República S.A., cu ta opera bou di e nomber comercial Wingo, desde 19 di october 2016. E compania ta pertenece na Copa Holdings. El a cuminsa bula pa Aruba na december 2016 como e prome Low-Cost Carrier pa sirbi Aruba for di Colombia. Brindando mercadonan local y di placer tarifa abou, bon ambiente y hopi flexibilidad. Separa di Aruba, ta bon pa bisa cu Wingo ta bula tambe pa ciudadnan Colombiano, manera Armenia, Barranquilla, Bogota, Cali, Cartagena, Medellin, San Andres y Santa Marta. Ta bula vuelonan regular pa Costa Rica, Cuba, Corsou, Republica Dominicana, Ecuador, Guatemala, Mexico, Panama y Peru.
Wingo a cuminsa bula avionnan 737-700 pero dos aña pasa a cambia tur nan avionnan. Awendia nan ta bula avionnan marca Boeing, modelo 737-800. Nan tin ocho di e avionnan aki, cu ta carga no menos di 189 pasahero.
