ORANJESTAD – E siman aki na Lima Peru, ta tumando luga e asamblea general di Organization of American States (OAS). E tema general di e asamblea ta ‘Hunto contra desigualdad y descriminacion’. Prome Minister Evelyn Wever-Croes ta representa Reino Hulandes den e asamblea aki. Ya na comienso di e programa, Prome Minister a hiba palabra y a enfatisa e importancia pa mantene dialogonan manera e asamblea aki cu ta reenforsa lasonan cu e paisnan miembro y participante.
Lamentablemente, e pandemia di Covid a empeora drasticamente e desigualdadnan cu ya caba tawata tin no solamente den nos region sino den resto di mundo. Desigualdad no ta un fenomeno cu ta aparece riba su mes. E ta vincula estrechamente cu un multitud di reto global, incluyendo cambio climatico y e insiguridad alimenticio. Y solamente si nos traha hunto, nos por confronta e retonan difícil di desigualdad aki.
Prome Minister a indica cu Reino Hulandes ta sigui mustra un compromiso solido cu e esfuersonan di OAS pa reenforsa democracia. Tambe Reino Hulandes ta reafirma su compromiso solido pa apoya e trabou di OAS den promove derechonan humano especialmente dunando atencion na gruponan vulnerabel.
“Sin embargo, nos ta testigo ainda di structuranan vulnerabel entre otro e falta di siguridad social debi na e grado halto di informalidad; mal servicio den salud publico y den enseñansa y desafortunadamente tambe, un aumento di presion riba derechonan humano, igualdad di genero, democracia y e estado di derecho. Tur esakinan, pa Gobierno di Aruba y Reino, ta keda como prioridad riba agenda. Hunto so, manteniendo discusionnan honesto y critico, por logra cambia e desigualdadnan aki”, Prome Minister a enfatisa.
Riba e topico di Venezuela, Prome Minister a expresa cu siendo bisiña di Venezuela, Aruba y Reino ta preocupa cu e crisis humanitario na Venezuela cu ta afecta varios pas incluyendo paisnan di Reino den Caribe. “Nos ta urgi tur esnan concerni, pa traha hunto y pro pa un transicion stabil, husto y democratico”.
Prome Minsiter, na final di su discurso, a enfatisa cu Reino Hulandes, a pesar di tur reto, no ta perde speransa. “Tur crisis por desemboca den innovacion y perspectiva nobo pa soluciona problemanan di desigualdad y descriminacion. Confronta e retonan aki ta rekeri pa inverti den nos pueblonan, pa construi sociedadnan democratico cu ta traha hunto. Reino Hulandes, den su calidad di observador activo y bon bisiña, lo sigui ta socio di OAS den futuro”, Prome Minister a expresa.
