ORANJESTAD – Awe merdia Hof di Corte Superior a dicta sentencia den e apelacion di e homber P. (35), contra su sentencia pa a abusa di un mucha homber di 15 aña.
ARUBANATIVE por a compronde cu Hof ta haya P. culpabel pero no ta haya cu e mester wordo prohibi pa sigui traha como “leerplicht ambtenaar”. Hof a baha e castigo di 4 aña na 3 aña di prison.
ACUSADO A APELA SENTENCIA
Ta asina cu P. a apela e sentencia di 5 Februari 2022, caminda el a wordo haya culpabel di a abusa di un mucha homber di 15 aña.
Fiscal durante tratamento di e caso a exigi 4 aña di prison di cual 6 luna ta condicional cu un tempo di prueba di 3 aña. Esaki cu e condicion cu P. ta cay bou guia di Reclasering. Tambe Fiscal a exigi pa prohibi P. pa haci su trabao te caminda ley ta permiti.
Hues den su sentencia a bisa cu tin indicacion cu P. via social media ta persigui muchanan pa abusa di nan. A haya den cellular di P. potret di mucha menor di edad y e mucha a bisa Polis cu P. ta un maniac. Tin un otro mucha cu a bisa cu P. a ofrece placa pa abusa di dje.
Na opinion di Hues, mirando cu esakinan ta cuadra cu loke e victima a pasa aden, e ta haya cu tin suficiente prueba di sosten.
Hues a confirma e exigencia di Fiscal esta a condena P. na 4 aña di prison di cual 6 luna ta condicional cu un tempo di prueba di 2 aña. Esaki bou guia di Reclasering. Hues no a menciona nada cu ta prohibi P. di sigui haci su trabou.
HOF A BAHA CASTIGO
Via video conference, awe merdia, un Hues di Corte di Husticia a lesa e sentencia di Hof pa e acusado cu tabata den un oficina den KIA.
Hof a mustra cu P. a apela e sentencia y PG a pidi pa confirma e castigo y e prohibicion pa P. traha como “leerplicht ambtenaar”.
Hof ta haya P. culpabel pero no ta haya cu mester prohibi P. di sigui traha como “leerplicht ambtenaar”. Hof a reduci e castigo di 4 aña na 3 aña di prison di cual 1 aña ta condicional cu 3 aña di prueba y bou guia di Reclasering.