Diamars, 27 di september 2022, reunionnan di IPKO a inicia na Den Haag Hulanda. E dia a cuminsa mainta trempan y tabata un dia largo. Hunto cu Presidente di Parlamento Edgard Vrolijk, representando delegacion di Aruba nos a atende un reunion cu Presidente di Eerste Kamer Prof.dr. J.A. Bruijn.
Un reunion cortico pero hopi ameno caminda nos a keda yama bon bini y a haya splicacion di Eerste Kamer, nan edificio temporal y tambe di e renobacion andando na Binnenhof. Temporalmente nan ta ubica den e edificio monumental y historico yama Huis Huguetan cu durante tempo a keda amplia cu un pida nobo y moderno.
Durante e reunion aki e importancia di arte a keda accentua y duidelijk den ful e edificio bo por tuma nota di esaki. Eerste Kamer tin un coleccion bunita di arte cu ta consisti di arte hopi bieu (mas cu 300 aña) y arte moderno. Unda bo cana den e edificio actual bo ta mira y experiencia esaki. Hopi bunita mes. No ta algo cu a sosode sin mas. Ta ful un kunstplan a keda traha hunto cu conseheronan di arte di rijksoverheid. E plan aki tin 3 tema central: 1) “de verbinding tussen heden en verleden”, 2) “reflectie en verbeeldingskracht” en 3) “de blik naar buiten”. Pa realisa e decoracion di e edificio nan a uza arte di nan coleccion propio pero tambe di museonan y a laga traha nobo. Como regalo nos a haya un bunita publicacion al respecto.
Mi a encanta e vision tras di ful e proyecto aki caminda un instituto bieu manera Eerste Kamer ta muda pa un edificio nobo, arte bieu ta keda combina cu obranan nobo y inspirativo di artistanan di awe. Manera nan mes ta bisa nan ta spera cu mediante esaki nan lo inspira, conecta y pone uno pensa. Uzando un di e funcionnan mas clave di cultura.
Otro punto cu nos a trata ta tur e retonan actual cu nos tin caminda a keda enfatisa cu trahando hunto nos ta mas fuerte. A papia di e relacion den reino y cu nos mester sigui estrecha esaki na beneficio di nos pais y nos hendenan. Durante e dianan nos dilanti mi lo ta brindando mas informacion encuanto e diferente puntonan cu a keda atendi durante e prome dia di IPKO.