“Danki na boso nos por gaba cu nos tin turista”
Turismo ta contrubui na crecemento y desaroyo di un pais. Como Aruba su unico pilar economico, cada ciudadano mester realisa e importancia di turismo pa nos pais. E pandemia a pone hopi ciudadano realisa e balor di turismo mucho mas ainda. Ta pa e motibo aki tambe, cada un di nos mestrer ta gradecido cu nos turismo ta lantando atrobe. Y esaki ta debi tambe na tur esnan cu ta traha den e sector turistico.
Diamars 27 di september mundo a celebra Dia Mundial di Turismo, Prome Minister Evelyn Wever-Croes en conexion cu e dia importante aki ta expresa palabranan di gradicimento na tur esnan cu ta traha den e area aki cu cu ta brinda servicio na nos turistanan.
“Danki pa e trabou cu boso ta haci incansablemente pa awe nos tin un pilar economico. Nos por gaba cu nos tin turista pero si no ta pa abo cu ta labora di dia y anochi, nos no por ta gaba di e forma aki. Mi ta kere cordialidad di nos hendenan ta locual cu ta yama nos turistanan bin bek y pa esey un danki grandi di curason”, Prome Minister a expresa.
Gobierno di Aruba, en conexion cu e dia aki, a duna reconocemento na e pioneronan cu tabata tin un vision grandi e temponan aya cu tabata un riesgo pa inverti den turismo. A reconoce señor Juancho Irausquin como esun cu a bin cu e vision, señor Ike Cohen y otronan tambe cu a contribui cu awe nos tin un pilar economico exitoso.
Tambe Prome Minister a duna reconocimento na Minister Dangui Oduber cu durante e pandemia nos turismo a wordo redefini pa Aruba. Si a tuma e actitud cu otro pais a tuma, e actitud di miedo y di no ta proactivo, lo awe ainda Aruba no ta recuperando. “Awe danki na e hecho cu nos tabata tin un vision, cu Minister Dangui a demostra hopi curashi y determinacion, nos a cuminsa cu e reapertura di nos fronteranan hopi prome cu otro paisnan. Nos tabata bon prepara danki na e sosten di ATA y nos departamentonan di gobierno cu awe nos por bisa cu nos turistanan ta biniendo bek y cada un cu bay bek nan pais ta papia con bon y safe Aruba ta y esey ta genera mas turista”, Prome Minister a duna di conoce.
Riba e dia aki, CEO di ATA, señora Ronella Croes a indica cu nos turismo ta recupera 100% e aña aki. Te cu poco tempo pasa a wordo indica cu solamente lo logra 97%. Esaki sigur ta un bon noticia. Otro aña e lo ta 105%. Esaki un biaha mas ta danki na cada un cu ta labora di mainta te anochi pa crecemento y desaroyo di nos pilar economico.