SEÑOR JUAN ENRIQUE IRAUSQUIN Y SEÑOR IKE COHEN
Diamars 27 di september en conexion cu “Dia Mundial di Turismo” a tuma luga un ceremonia y ponemento di krans na Plaza Juancho Yrausquin pa relexiona riba e esfuerso di cada trahado den henter e industria turistico, for di esnan cu ta traha den sector hotelero, pa esnan cu ta traha na aeropuerto y taxistanan. Pero tambe a honra y dedica e dia na dos lider pionero den turismo, señor Juan Enrique Irausquin y señor Ike Cohen. Prome Minister Evelyn Wever-Croes den su discurso na e ocacion, a conta e storia di ambos persona enfatisando e esfuerso cu cada un a haci pa nos industria turistico.
E industria turistico di Aruba a inicia cu vision di un lider cu a mira mas leu den temponan dificil despues di guera. El a pensa cu kisas un dia e refineria lo no tey mas y cu Aruba lo mester ta prepara. Nomber di e persona aki ta señor Juan Enrique Irausquin. Despues di a traha como bankero pa hopi aña, señor Yrausquin a drenta den politica y na 1949 el a lanta su propio partido politico PPA. For di 1955 pa 1975, Juancho Yrausquin y su partido a goberna Aruba cu un mayoria absoluto na varios ocasion.
Hunto cu su man drechi den gobernacion, sr. Oscar Henriquez, señor Yrausquin a convence empresarionan pa kere den Aruba y den nan plan. Despues di establece e planta di awa y coriente pa Aruba, a expande Aeropuerto cu un pista nobo, a traha boulevard y a traha cu e miho arkitectonan di Merca, pa diseña Aruba su prome hotel grandi, Aruba Caribbean Hotel. E hotel aki a bira e carchi di invitacion internacional di Aruba, pa invita turistanan for di Merca, Europa y henter mundo pa pasa nan vacacion riba nos isla. Awe, riba Dia Mundial di Turismo 2022 ta conmemora cu 60 aña pasa (20-06-1962) señor Juan Enrique Irausquin a fayece.
Ademas a conmemora cu 15 aña pasa e exitoso empresario/hotelero masha stima señor Ike Cohen a bay laga nos. Despues di a perde su mayornan y ruman den segunda guera mundial, señor Cohen kier a cuminsa un bida nobo den un pais leu di Europa y leu di e situacionnan cu tabatin den guera. Hulanda e tempo ey a ofrece apoyo financiero pa esnan cu lo kier a bay biba y inverti den e colonianan di Reino. sr. Cohen a bay Corsou, despues Surinam, y despues finalmente el a scoge pa forma su bida na Aruba.
Aki el a cuminsa cu un compania di verf edificio y bibando na forma humilde el a cuminsa traha cu curashi y optimismo y cu determinacion. Na 1964 el a gana suficiente cu e por a cumpra Coral Strand hotel, motiva pa sr. Oscar Henriquez (man drechi di Juancho Yrausquin) kende tabata motiva empresarionan pa inverti y pa kere den Aruba. Despues sr. Cohen y su casa a cambia nomber di e hotel pa Talk of the Town Hotel y a sigui inverti cu construccion di Mancheo Beach Resort y mas compania. Asina creando miles di cupo di trabou pa nos hendenan y promove artistanan local pa entretene nan huespednan.
Durante di su ultimo añanan sr. Cohen a dedica su aniversario pa recauda fondo pa obranan di caridad y yuda fundacionnan social. Riba un 23 di september, 15 aña pasa, sr. Ike Cohen a fayece na edad di 96 aña.
“Asina Aruba a conoce mas pionero den turismo cu awe ainda ta cu nos, manera por ehempel sr. Michael Kuiperi, sr. Rori Arends y sr. Harold Malmberg. Awe despues cu Aruba a pasa den e pio crisis di historia cu e pandemia, ta e legado aki di nos lidernan pionero y visionario combina cu lucha estatal di Libertador Betico Croes y combina cu determinacion di tur esnan cu a traha den sector di hotel y restaurantnan, a motiva nos pa lanta bek cada dia cu animo y determinacion pa traha duro pa nos recuperacion despues di cada crisis atrobe. P’esey ta gradici sr. Juancho Yrausquin y sr. Ike Cohen pa nan esfuerso cu determinacion pa realisa nan vision di turismo pa Aruba”, Prome Minister Evelyn Wever-Croes a expresa.
