ORANJESTAD – Diahuebs Minister di Turismo y Salud Publico sr. Dangui Oduber ta conscientisa comunidad riba e importancia di Dia Mundial di Curason. E dia aki mester sirbi como un oportunidad pa tur hende para keto y considera con ta e mihor manera pa uza bo curason pa entre otro humanidad, naturalesa y bo mes. Combati e malesanan cardiovascular sigur ta importante pa cada curason cu ta bati. Conscientisacion ta un parti hopi importante den cuadro di e plan nacional di prevencion di malesanan NCD’s, e mandatario ta comenta.
Uza nos curason ta nifica pa pensa diferente, pa tuma e desicionnan corecto, pa actua cu corahe y yuda otro. Pa por compromete bo mes cu e causa importante aki bo mester uza bo curason. E curason ta e unico organo cu bo por scucha y sinti, e ta e prome y ultimo señal di bida. Tambe e ta un di e poco cosnan cu tin e potencial pa uni nos tur como ser humano.
Un di e causanan cu mas ta afecta nos curason ta presion halto, esaki por wordo combati door di hiba un bida mas saludabel. Presion halto ta afecta mas cu 30% di adultonan rond mundo, cu ta encera mas cu 1 biyon persona. E ta e factor di riesgo principal di malesa di curason (cardiovascular, specialmente malesa coronario y stroke (atake celebral), pero tambe malesa di riñon crónico, problema di curason, aritmia y demencia.
Minister Oduber a trece dilanti cu comunidad lo por bay mira entre otro lusnan cora na bustuurs kantoor, na retonde dilanti di WEB y tambe na Aeropuerto Internacional Reina Beatrix, e lusnan aki ta pa conmemora e Dia Mundial di Curason cu ta hopi importante pa comunidad. Tambe e mandatario ta urgi comunidad pa sigui haci nan testnan di presion, haci bo chekeo mediconan regularmente pa preveni cualkier tipo di malesa.
Den cuadro di e plan di prevencion e mandatario a duna di conoce cu lo sigui cu e campaña di “sa bo number” cu sigur ta dunando su fruto. Minister Oduber ta spera cu e mensahe di Dia Mundial di Curason logra yega na mastanto hende posibel, pa yuda logra un salud cardiovascular pa cada curason.
