ORANJESTAD – Awe mainta Hues a dicta sentencia den e caso penal cu Ministerio Publico a cuminsa contra e dama M.G.(52).
ARUBANATIVE por a compronde cu Hues a haya M.G. culpabel y a conden’e na un castigo combina casi manera Fiscal a exigi.
EXIGENCIA FISCAL
Algun siman pasa tratamento di e caso a tuma lugar, caminda ta acusa M.G. di a malversa 4300 florin na Ministerio Publico y falsificacion di recibo entre 1 Januari 2017 y 31 December 2021.
Fiscal a exigi 240 ora di trabao pa comunidad y si M.G. no cumpli cu esaki e lo mester bay 120 dia sera. Ademas Fiscal a exigi 3 luna di prison condicional, cu un tempo di prueba di 3 aña.
NO PROBA MALVERSACION NA TRABAO
Awe mainta e dama M.G. no a presenta. Solamente su abogado mr. Hart. Hues a bisa cu e no ta haya proba cu M.G. a malversa placa cu el a haya di hende pa paga na Ministerio Publico. Hues a bisa cu M.G. no tabatin e placa como ambtenaar di Ministerio Publico. E placa nunca a yega Ministerio Publico. Hues a declara M.G. liber di e acusacion aki.
MALVERSA HENDENAN
Hues a sigui bisa cu e ta haya legalmente proba cu M.G. a malversa e hendenan cu dun’e placa pa paga boet. M.G. a gasta e placa na algo otro. Tambe Hues a bisa cu e no ta haya proba full e periodo di 1 Januari 2017 te cu 31 December 2021. Na opinion di Hues, investigacion ta mustra cu ta e periodo di Januari 2020 pa December 2021.
FALSIFICACION
Den computer di Ministerio Publico a constata cu M.G. a pone cu hendenan a paga. A falsifica informacion den computer door di pone cu nan a paga nan boet, siendo cu esey no a sosode.
CASTIGO
Pa cu e castigo, Hues a bisa cu e ta tene cuenta cu M.G. a kibra e confianza di e hendenan cu a dune placa pa paga. Tambe cu M.G. a kibra e confianza di Ministerio Publico. Hues a tene cuenta tambe cu ta promer biaha cu M.G. ta cay sera. El a condena M.G. na 3 luna di prison condicional cu un tempo di prueba di 3 aña. Tambe Hues a condena M.G. na 200 ora di trabao pa comunidad y si e no cumpli cu esaki, e lo mester bay 100 dia sera den prison.