E hoben Angel Gabriel Senra Chara di 19 aña a bira di 6 victima di trafico pa 2022. Despues di tabata envolvi den un accidente basta serio riba Watty Vos Boulevard, e la wordo transporta cu urgencia pa hospital y na yegada lamentabelmente e hoben a fayece.
Watty Vos Boulevard:
Diamars algo prome cu 7’or y mey di anochi a sosode un accidente basta serio riba e caminda di Watty Vos Boulevard un poco mas pazuid di e Muffler shop Sabana Blanco.
Na e sitio nos a bin compronde cu na e T kruising pabou di e Mufflershop, un brommer Suzuki 750, GSXR 2010 maneha pa un hoben, a subi Watty Vos Boulevard pa bay direccion rotonde Wayaca, net na momento cu di panort tabata biniendo un BYD blanco cu velocidad basta halto, e brommer mesora a hala bay na e banda pariba y e dama chauffeur pa trata di no dal e brommer tambe a hala y a pase na su banda drechi, pero pasando e chauffeur lo a perde control y a bay dal contra e brommer. E impacto tabata hopi fuerte cu e rand bandi pariba di e caminda a kibra y despues di e impacto e auto a bolter. Segun un testigo e BYD tabata biniendo hopi duro y cu net prome cu e impacto e la pasa un auto cu un velocidad basta halto.
Un dama tabata tras di stuur di BYD y den e auto tabata tin un mucha basta chikito. Despues di e impacto e dama chauffeur a spanta asina hopi cu e la bay sinta den e greppel bandi pabou di caminda y a manera bay den un shock.
Personanan cu tabata cerca mesora a sali bay yuda y a bati alarma. Un habitante di un cas net pabou di unda e accidente a sosode a hiba e dama chauffeur y e mucha paden su cas.
Polis y ambulance a yega hopi lihe na e sitio. Polis a cera e caminda y mientras tanto e paramediconan di ambulance tabata traha cu victima, dunando e CPR. Specialista di trafico a bay na e sitio pa haci mas investigacion. Slachtofferhulp a wordo pidi na e sitio pa atende tambe cu e chauffeur di e BYD cu a bay den shock. Despues cu e paramediconan lo a logra su haya pulso a sali cu e victima cu hopi urgencia pa hospital.
Lamentabelmente un rato despues di su yegada na hospital e hoben motociclista a fayece.
Arubanative.com ta manda su palabranan di profundo condolencia y hopi forsa na famianan y amigonan di Angel Senra Chara.
