ORANJESTAD: Diabierna ultimo nos a celebra cu 7 aña pasa Nacionnan Uni a adopta e Agenda 2030 pa cu desaroyo sostenibel, cu e meta pa logra un miho mundo. Gobierno di Aruba semper a pone e 17 Metanan di Desaroyo Sostenibel miho conoci como Sustainable Development Goals (SDG) como prioridad. Durante SDG week, rond mundo henter, ta para keto na e metanan di desaroyo sostenibel cu mundo ta aspira pa alcansa. Un total di 17 meta di desaroyo sostenibel cu ta un yamada urgente pa tur paisnan tuma accion den ‘partnership’ cu otro. E metanan ta reconoce cu eliminacion di pobreza y otro inigualdadnan ta bai man den man cu strategianan cu ta promove salud, educacion, reduccion di desigualdad, y cu ta duna impulso na crecemento economico. Tur esaki teniendo na cuenta e preservacion di nos medioambiente. Aruba, tambe a compromete pa implementa e SDGs y a bin ta organisando su mes cada bes mas pa esaki. Recientemente Aruba a presenta na e Voluntary National Review di United Nations e avansenan cu Aruba ta haciendo pa implementa e SDGs. SDG #4 ta dirigi su mes na crea enseñansa di calidad cu ta inclusivo y cu ta duna tur alumno e oportunidad pa siña segun nan habilidad y circunstancia. Tambe ta promove oportunidad pa tur hende siña pa bida largo.
Concluyendo Minister Endy Croes ta felicita y ta gradici Minister di Asuntonan Economico y Desaroyo Sostenibel, sr. Geoffrey Wever y e comision di SDG cu a organisa e mainta aki.
