Pa tin continuacion como tambe durabilidad relaciona cu e metodo preventivo Codigo di Proteccion den e casonan di (sospecho di) abuso di mucha na Aruba, tin un grupo di profesional den e 4 sectornan: social, husticia, enseñansa y salud ta trahando riba e contenido di un Toolkit Digital Codigo di Proteccion (CdP). E meta di e Toolkit Digital CdP aki ta pa tur e profesionalnan den e 4 sectornan por educa y informa nan mes riba diferente tema relaciona cu abuso/maltrato di mucha.
Colaboracion cu Augeo Foundation y UNICEF NL
E team di CdP Aruba: Jullie-Ann Thode (sector enseñansa), Efraim Suurendonk (sector social), Dorilis Werleman (sector husticia), Laura Rumahloine (sector salud) hunto cu Sue-Ann Ras (coordinadora nacional) ta trahando riba e siguiente pasonan concreto pa garantisa y salvaguardia siguridad y bienestar general di nos muchanan mediante uzo di Codigo di Proteccion.
E Toolkit Digital CdP ta netamente desaroya cu Augeo Foundation, cu ta un fundacion particular na Hulanda, cu ta traha riba siguridad di tur mucha. Nan ta hacie a base di investigacion, conseho di maneho, proyecto y profesionalisacion y ta contribui grandemente cu e desaroyo di profesionalisacion di Meldcode na Hulanda. Den 2020 un rond di 135 mil cursista profesional na Hulanda a acudi na e cursonan di Augeo y nan tin tambe como 11.600 profesional cu ta lesa nan revistanan.
UNICEF NL ta vigila e proceso di cerca, mirando cu nan a contribui pa Aruba yega na e fondonan necesario via di Union Europeo y Postcode Lotterij pa ehecuta e productonan; Toolkit Digital CdP y un Revista Digital, cu lo tin 5 pa 8 tema pa engrandece conscientisacion y comparti conocemento.
Toolkit Digital CdP
Diahuebs ultimo e contentgroep, cu ta consisti di 17 profesional na Aruba, a sinta pa delinea e trabounan den e 5 temanan. E reunion aki a bay den un ambiente hopi positivo y energetico, mirando cu a parti e grupo den 5 sub grupo, unda cada profesional lo enfoca riba un topico di interes y conexion cu nan trabou diario. Meta ta pa december awor entrega varios producto cla na Augeo, pa nan cuminsa haci nan parti di trabou. E cinco temanan di e Toolkit Digital CdP ta: Abuso di mucha – Kico e ta haci cu mi? – Señala – Tecnica di combersacion – Consecuencia(nan). Cada tema tin subtema, unda cu lo elabora riba diferente topico di interes via video, documento informativo, infographics, quiz, etc.
Abuso di Mucha tin tur atencion y mester corda cu e problema aki no ta algo cu solamente e profesionalnan, e instancianan of gobierno por trece solucion. Mester ta tarea cu tur e mayornan tambe mester duna atencion debido y urgente na dje, unda cu hunto ta yuda cu traha na e proteccion di nos muchanan y structuralmente mehora y optimalisa henter e sistema na Aruba. Finalmente como pais Aruba nos mester tin como meta principal, pa e muchanan por lanta y crece den un ambiente di siguridad, sin violencia y asina brinda nan e oportunidad pa desaroya optimalmente y laga nan talentonan desplega.
