Home Politics Prome Minister Evelyn Wever-Croes: Imsan a Celebra ‘Ring Bell Ceremony’  ...

Prome Minister Evelyn Wever-Croes: Imsan a Celebra ‘Ring Bell Ceremony’  NA HONOR DI E 500 PASHENT CU A FINALISA NAN TRATAMENTO CU EXITO NA IMSAN

SHARE

 

 

Diahuebs 22 di September, e Instituto Medico San Nicolas (ImSan) a celebra ‘Ring Bell Ceremony’ na honor di e 500 pashent cu a finalisa nan tratamento cu exito na ImSan. “Pa yega na e punto aki, como Gobierno, desde principio nos a kere den e exito di e proyecto aki di comberti ImSan den un hospital di estadia corto”, Prome Minister Evelyn Wever-Croes a expresa.

Dia 12 di april 2021, a tuma luga e apertura oficial caminda a converti e ImSan den un hospital di 22 camber pa estadianan corto. For di e dia ey te cu awe, ImSan a registra storianan exitoso un tras di otro. No solamente ImSan a ricibi y brinda estadia cortico na e publico pariba di brug, pero tambe a atende ciudadano di tur parti di nos isla. 

 

Pa cua motibo tambe a inverti Afl. 60 miyon pa e wordo realisa. ImSan a amplia e cantidad di tratamentonan cu por a brinda su pashentnan, a crea 50 cupo nobo di trabou, a adkiri varios ekipo y instrumento medico cu no tawata disponibel na Aruba. 

E exito di ImSan no solamente ta debi na e inversion den ekipo y instrument. E exito ta basa riba e hecho cu ImSan tin e persona indica pa dirigi. Un persona kende tin su curason na e luga corecto, mustrando amor, dedicacion y pasion pa su profesion. Dr. Joel Rajnherc tin tambe e profesionalnan cu ta comparti e mesun pasion, determinacion y amor pa tur pashent cu ta bishita ImSan. 

 

“Mi ta felicita bo, dr. Joel Rajnherc, pa bo añanan di dedicacion na ImSan y bo conviccion cu tawata posibel pa hiba ImSan na un siguiente nivel. Mi ta felicita tambe tur professional y tur esnan cu ta traha na ImSan cu a acompaña bo den e viahe aki cu ta culmina den e ‘Ring Bell Ceremony’ aki. Mi sa cu lo tin mas milestone na caminda y nos lo celebra nan tambe”, Prome Minister Evelyn Wever-Croes a expresa.