Home » Partido MEP na Rycond do Nascimento: E diferencia fundamental entre MEP y AVP ta cu AVP ta un partido corupto y MEP ta traha pa pueblo

Partido MEP na Rycond do Nascimento: E diferencia fundamental entre MEP y AVP ta cu AVP ta un partido corupto y MEP ta traha pa pueblo

by Admin
0 comment 87 views

 

 

Den un atake di desesperacion y sabiendo cu AVP y su lider Eman no tin ningun credibilidad mas den pueblo, e parlamentario Rycond do Nascimento a haya ta bon di emiti un comunicado den cual e kier a haci un comparacion entre lider di MEP y lider di AVP. Algo insolito ya cu e mentalidad di e dos lidernan aki ta diferencia di dia y anochi. Sin duda cu pueblo mes ya na e altura aki caba ta consciente den ki desaster financiero Mike Eman a hinca henter nos pais aden. Esaki ta e legado tristo y di desaster cu Mike Eman lo laga atras ora cu yega e momento di retira for di politica activo y un otro Eman asumi liderazgo di partido AVP. 

 

Creador di Megadebe

Mike Eman den su funcion di Minister President a endeuda nos pais den un forma hamas bisto y asina mes despues cu na 2009 el a hereda 970 miyon florin laga atras pa Gabinete Oduber. Te cu e dia di awe Mike Eman no por splica pueblo kico el a haci cu e reserva di 970 miyon florin aki! 

E deficitnan acumula durante su gobernacion di 2010-2017 a suma total 2.2 Biyon florin. Fuera di esey Mike Eman y su gobierno a crea e proyectonan PPP cu tambe a yega na un debe total di mas di 2 Biyon florin. Tur e proyectonan PPP nos tur y e futuro generacionnan mester paga ainda for di aña 2018 te cu aña 2044 na un suma di 85 miyon florin pa aña. Ta danki na Mike Eman tambe cu awe nos tur tin cu paga un debe na interes so di 250 miyon florin pa aña, siendo cu ora Mike Eman a drenta gobernacion na 2009 e pago na interes tabata solamente 116 miyon florin.

Hecho ta cu tur e deficit, megadebenan y pago di interes aki a ser crea den un periodo cu nos pais NO a conoce un pandemia ni crisis financiero mundial. 

 

Un logro historico

Contrario na esaki e lider di MEP Evelyn Wever-Croes den su funcion di Minister President a percura pa hiba un maneho financiero responsabel y asina mes cu na 2017 su gobierno a haya un caha bashi cu solamente rascanan di huña, sin reserva y cu un megadebe explosivo laga atras pa Mike Eman. Debi na Covid y e pandemia devastador, e deficit bao di gobierno di MEP a yega na 1028 miyon florin na aña 2020 – despues cu na 2019 ya nos a conoce un surplus di 6 miyon florin! – y den apenas 3 aña e deficit aki a wordo reduci te na 25 miyon florin na 2023. Un logro historico y inigualabel den Reino y pa cual nos tur como Arubiano mester ta orguyoso di dje.

 

Locura y mas locura

Locual a resalta tambe durante e periodonan di e dos Minister Presidentenan tabata e forma con Mike Eman a goberna e pais aki, esta subi pal’i luz pa pega bombiyo, verf cas bandona, chapi cura na un cas bandona, core tras di truck di sushi den oranan di anochi, cana den barionan cu hala di coordinadornan su tras etc. Pregunta na Rycond ta si durante e ultimo 5 añanan e por a yega di mira nos actual Minister President Evelyn Wever-Croes ta haci tur e locuranan aki? Hecho ta cu nos tin un Minister President bon na tino, un ser femino trahado y semper trahando duro na interes di henter comunidad. Un digno mandatario di un pueblo orguyoso.

 

AVP cu integridad den gobernacion?

Ora Rycond ta papia di integridad den politica y gobernacion, e mester ta menos di papia ya cu desde entrada di Status Aparte te cu awo ta solamente politiconan y te hasta ex-lider di AVP tabata den Corte pa actonan coruptivo manera den e Fondo Desaroyo Nobo San Nicolas (Tico), caso Ibis di e permisonan (Paul), caso Avestruz di e terenonan (Benny, Gaby) y hopi mas cu lo sigui den futuro cercano (e.o. Mike1, Mike2, Richard). No mester lubida tur e coordinador y friendsnan di e ministernan di AVP cu tambe a yuda comete tur e corupcionnan aki.

“Rycond, bo no tin berguensa di ta pertenece na un partido corupto asina cu bo ta defende tur dia ciegamente?”

Contrario na esaki partido MEP durante 51 aña di existencia NUNCA su politiconan a yega di haya nan mes ta duna cuenta den corte pa corupcion y bagamunderia den gobernacion!

 

Esakinan ta solamente algun ehempel pa mustra Rycond cu e mester bira serio si, duna honor na e supuesto titulo di profesor cu e ta carga y no bay compara su lider Mike Eman y AVP cu nos actual lider Evelyn Wever Croes y MEP.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio