Home Dutch Kingdom Kondekorashon Real pa Gobernador saliente di Sint Maarten

Kondekorashon Real pa Gobernador saliente di Sint Maarten

SHARE

Awe a nombra Gobernador saliente Eugene Holiday di Sint Maarten komo ‘Commandeur in de Orde van Oranje Nassau’. Durante un resepshon di despedida den ‘Grote Kerk’ na Den Haag el a risibí e kondekorashon real for di man di sekretario di estado Alexandra van Huffelen di Relashon den Reino.

Durante e resepshon sekretario di estado Van Huffelen a para ketu na e tantísimo logronan di Gobernador Holiday pa Sint Maarten. El a menshoná ku e periodo máksimo di 2 bes 6 aña a terminá i a wak bèk riba e papel ku el a desempeñá e periodo anterior. “Por ehèmpel bo tabata e faktor stabil ku a guia Sint Maarten surpasá diferente krísis polítiko. Mi por imaginá mi mes ku no tur ora tabata fásil pa asistí diesun diferente gabinete. Pero den e tempunan turbulento akí tambe bo a sòru pa loke no por a warda, a sigui kana.”

A duna atenshon speshal tambe na e papel ku Gobernador Holiday a hunga durante konsekutivo krísisnan manera Irma i e pandemia di Covid. Ademas e sekretario di estado a ekspresá su apresio pa su manera kuidadoso di traha, su manera íntegro di aktua, kon aksesibel e tabata pa kada habitante di Sint Maarten i su esfuerso pa hóben i bon enseñansa.

“Bo a yena bo dos periodonan di forma fantástiko”, e sekretario di estado a konkluí i a sorprendé e Gobernador ku un nombramentu komo ‘Commandeur in de Orde van Oranje Nassau’. Un kondekorashon ku masha poko ta ser otorgá. E kondekorado mester a desplegá aktividat hopi eksepshonal òf importante.

Den su papel komo Gobernador Eugene Holiday tabata representá Rei. Den e kalidat ei e tabata tambe hefe di gobièrnu na Sint Maarten. Den e funshon ei Gobernador ta intachabel i ta ministernan ta responsabel. Komo órgano di Reino Gobernador ta atendé e interesnan di Reino Hulandes.

Riba 10 di òktober Ajamu Baly lo sigui Eugene Holiday komo Gobernador.