Trabou serio ta wordo haci pa Aruba por conoce stabilidad financiero na bienestar di un y tur
Den lineanan grandi Minister Xiomara Maduro ta splica riba e trabaonan cu a wordo realiza den e prome aña di gobernacion Gabinete Wever-Croes II. COVID19 a afecta nos finansa publico grandemente y den e prome aña di gobernacion nos a dedica pa reduci e deficit cu e pandemia aki a trece cune pa Aruba. E deficit di 1028 miyon florin ta wordo reduci grandemente den apenas 3 aña di tempo. Tur esfuerso ta dirigi pa Aruba por conoce atrobe un surplus.
Gobierno a sa di cumpli cu tur su debernan financiero
Den e prome aña di gobernacion, Gobierno a sa di cumpli cu tur su debernan financiero y a traha pa mantene e credibilidad financiero di nos pais. Aruba a mantene su rating di inversion cerca Standard & Poor’s y Fitch cu a cambia Aruba su rating di negativo pa stabiel, cu ta un noticia positivo pa Aruba por atrae inversionistanan.
Aruba ta score positivo den e lucha contra labamento di placa y financiamento di terorismo
Un otro logro pa Pais Aruba ta e evaluacion positivo cu Aruba a ricibi di Caribbean Financial Action Task Force (CFATF). Aruba y Bermuda tabata e unico dos paisnan den region di Caribe cu un score positivo den e lucha contra labamento di placa y financiamento di terorismo. Esaki ta un señal fuerte na inversionistanan cu Aruba su sistema financiero ta uno integro.
Ta sigui cumpli cu condicionnan di Hulanda pa ricibi sosten di likides y cu Landspakket
Gobierno a sigui traha na un forma constructivo pa sigui cumpli cu e condicionnan di Hulanda pa por ricibi sosten di likides y tambe pa por cumpli cu e Landspakket acorda entre Hulanda y Aruba. Pa nos Pais por ta mas fuerte y resiliente den cuadro di e ehecucion di e Landspakket a introduci un garantia di deposito pa sigura stabilidad di nos sistema financiero y proteccion di e consumidor. A haci investigacion riba, entre otro, maneho y otorgacion di subsidio y ta bay fortifica e funcionamento di e departamentonan crucial pa maneho financiero di Pais Aruba.
Gobierno ta trahando riba cambionan pa un sistema fiscal mas simple y husto
Riba tereno fiscal gobierno a prepara cambionan pa yega na un sistema fiscal mas simpel y husto pa Aruba. Na comienso di aña a organisa session di ‘stakeholders’ pa asina haya informa, ricibi comentario y sugerencia di varios gremio. A prepara pa e introduccion di un sistema di BTW, pero debi na e inflacion mundial creciente, a pospone esaki y na su lugar ta prepara un ‘Plan di Impuesto 2023’ cu ta keda presenta fin di september proximo.
Gobierno ta presenta Presupuesto 2023 na tempo
Riba e tereno presupuestario, Gobierno a traha pa cumpli na presenta presupuesto 2023 na ora, conforme locual nos Constitucion ta prescribi. Esaki despues di 15 aña cu Gobierno no a logra entrega prespuesto na ora na Parlamento di Aruba.
A contene gasto di personal y baha gasto di servicio y producto
Den e prome aña di gobernacion a traha na un manera responsabel pa reduci gasto di gobernacion door di contene gasto di personal y baha gasto di servicio y producto. Tambe a percura pa hiba un maneho di no crea debe innecesario, pa asina baha e presion riba nos finansa publico.
Minister Maduro ta enfatisa, cu den e temponan dificil aki, Pueblo por tin e trankilidad cu trabou serio ta wordo haci pa Aruba por conoce stabilidad financiero na bienestar di un y tur.
