Home Local Asociacion di Accountants (AVA) cu exitoso ‘Community Talk’

Asociacion di Accountants (AVA) cu exitoso ‘Community Talk’

SHARE

 

 

Oranjestad – Diamars atardi a tuma lugar e prome ‘Community Talk’ di Arubaanse Vereniging voor Accountants (AVA) na Renaissance Wind Creek Aruba Resort. AVA conhunto cu ENDYMION Permanente Educatie B.V. a organiza un debate tocante ‘Integridad, cultura y e desaroyonan den e ramo di Corporate Governance’. Panelistanan Margreeth Kloppenburg, presidente di NBA Faculty of Ethics, Culture & Behavior, Jeannette Solognier, specialista di AML y forensico y director di Compra N.V. Hubert Dirks a debati extenso hunto cu e publico presente riba diferente topiconan interesante.

Den nan trabao diario, accountants functionando como external auditors, pero tambe esnan cu ta traha den compania (publico) sa encontra dilemanan etico. E tema di integridad, cultura y corporate governance a trece un discusion interesante tocante irregularidadnan y fraude pero tambe e retonan den aplica proceduranan y standards riba un isla chikito na unda tur hende conoce otro. E concequencia di trato preferencial pa esnan conoci, ta hunga un rol ya cu ta perde e percepcion di fair chance pa un y tur. Durante e debate tambe a papia di un concepto di ley nobo pa un ‘Corporate Governance Code’. Den e siguiente lunanan lo tin meetings cu diferente stakeholders pa duna nan input y e Asociacion di Accountants sigur lo ta un di e stakeholders nan cu por trece hopi input den esaki y juda trece mas transpariencia den proceduranan.

 

E Community Talk tin como objetivo pa dialoga cu comunidad riba diferente topico manera e dilemanan etico y combersa cu miembronan den e sector ta juda trece perspectivanan nobo y diferente. E directiva di AVA ta contento cu un evento exitoso y AVA ta compromete su mes pa sigui organisa eventonan y charlanan den futuro pa ofrece nan miembronan y stakeholders mas perspectiva y asina aporta na comunidad di Aruba.