ORANJESTAD – Recientemente, a tuma luga un anochi informativo pa tur Centro di Cuido di Mucha na Aruba. Departamento di Mucha y Hoben (DMH) conhuntamente cu Minister di Husticia y Asuntonan Social Rocco Tjon, a tene un encuentro informativo y interactivo, caminda a informa e Centronan di Cuido di Mucha riba diferente topico relaciona cu e implementacion di Ley di Kinderopvang pa Aruba. E topiconan cu a bin dilanti e anochi aki tawata Handleiding Kwaliteitseisen Kinderopvang Aruba; Supervision den Centro di Cuido di Mucha; Implementacion di Codigo di Proteccion den Centro di Cuido di Mucha y E plannan pa futuro.
Minister Tjon a accentua e importancia di e anochi aki, caminda a enfoca riba e documento final, esta e ‘Handleiding Kwaliteitseisen Kinderopvang Aruba 2022’, cual ta parti den cinco paso y e rekisitonan minimo necesario pa un Centro di Cuido di Mucha por opera.
Pa loke ta e trayecto di e manual di regulacion, por bisa cu ta trata di un trayectoria cu a tuma su debido tempo. For di november 2019, na momento cu sra. Sue-Ann Ras (Coordinadora Nacional Implementacion di Ley Kinderopvang) a tuma e liderazgo den implementacion di e Ley Kinderopvang, a inicia cu un Nulmeting den e Centronan di Cuido di Mucha. E Nulmeting aki tawata traha a base di e puntonan cu tabata tin den e concepto di e documento, ‘Handleidingsvoorschriften Kinderopvang’, traha door di un Stuurgroep Kinderopvang di 2015-2017.
Despues cu e stuurgroep di 2019-2021 a analisa e resultado di e Nulmeting (2020/2021), a opta pa revisa e manual di regulacion di 2015-2017 completamente y wak kico, realisticamente, por bay den e manual nobo, pa asina no tin consecuencia grandi of di un peso financiero impactante pa e Centronan di Cuido di Mucha. Mas cu claro e concepto di e manual aki a bay tambe pa tur Centro di Cuido di Mucha como tambe FPNM, pa asina nan tambe por aporta pa loke ta contenido.