Home Local Seminario y Debate: Siguridad y Derecho di Pashent

Seminario y Debate: Siguridad y Derecho di Pashent

SHARE

 

Riba 17 di september Fundacion SIKI a tene un evento gratis na Cas di Cultura titula Seminario y Debate: Siguridad y Derecho di Pashent 2022. E evento aki a consisti di dos parti. E prome parti tawata un ora den cual 3 charla conciso a wordo duna. E topiconan tawata e Derecho di pashent riba siguridad, sigui pa e siguridad di remedi garantisa door di Botica y finalmente salud mental na Aruba. E di dos parti tawata un debate entre profesionalnan den cuido riba e tema di siguridad di remedi y derecho di pashent. Organisacionnan cu a participa na e seminario y debate tawata: HAVA, HOH, ODEA, Imsan, AZV, IVA, VAA y Cliëntenraad Respaldo.

 

Exito grandi

E evento a resulta un exito grandi. Publico presente a duna comentario cu e evento tawata uno hopi bon organisa y cu informacion sumamente interesante pa pashent. Durante e ronda di pregunta por a mira hopi interes y varios persona a bai dilanti cu hopi pregunta. Publico por a scucha retonan practico den cuido di salud. E oradornan y debatistanan tambe a haya e oportunidad pa splica detayadamente kico nan ta haci tur dia pa sigura un bon cuido. Durante e debate a demostra cu nan tambe ta enfrenta retonan y tin na pecho pa sigui mehora e cuido mas cu ta posibel. Tin hopi interes di tanto publico como e sector di salud pa mas eventonan similar.

 

Comunicacion

Loke a resalta ta cu comunicacion entre tur partido den salud ta un di e prioridadnan cu mester traha riba dje. Esaki ta mehora e siguridad di remedi y tratamento. Comunicacion pa cu pashent tambe ta rekeri un sosten mas structural y tambe campañanan pa e pashent por sa mihor kico e por spera di cuido. Un di e posibel solucionnan den esaki ta un mihor infrastructura pa intercambia data.    

 

E pashent central

E mensahe principal di e evento ta, cu conforme e yamada di World Health Organization, mester mehora e siguridad door di pone e pashent central. E cifranan ta mustra cu mester traha riba esaki den tur pais y cu mester reconoce e siguridad di pashent como un derecho humano cu mester wordo regla den ley adecuadamente. Hopi importante ta pa compila e experiencia di pashentnan pa sigui mehora e cuido riba nivel individual y riba maneho di e pais. Como tal Fundacion SIKI a anuncia cu e ta lanza e prome Plataforma: Pashentnan di Aruba. Esaki ta pa bira e prome organisacion pa representa e pashentnan di Aruba.

 

Pa esnan cu kier mira e evento por wak esaki riba e Facebook pagina di SIKI Aruba of www.sikiaruba.org 

 

 

 

Parti 1 Seminario: https://youtu.be/k-EoUIE1DP0

Parti 2 Debate: https://youtu.be/yXzxvSJMfvY