Den e discurso di Gobernador en conexion cu Apertura di Aña Parlamentario Nobo e la duna atencion special na e consumidor. Gobernador a enfatisa cu economia ta toca nos tur y cu p’esey desaroyo economico mester aporta na calidad di bida di nos tur como ciudadano. El a sigui indica cu pa e motibo aki mester tin debido atencion pa mehora y proteha derechonan di consumidor.
Gobierno di Aruba lo institui Aruba Fair Trade Authority cu lo mester aporta na un clima di competencia husto, cu lo desemboca den mihor calidad di servicio, calidad di producto y prijs mas husto pa e consumidor. Algo cu mirando e situacion actual na Aruba y rond mundo, sigur ta sumamente necesario y importante. Den e aña parlamentario tras di lomba, despues di hopi aña di problematica di fiansa y interes excesivo, Parlamento a aproba e ley cu ta regla e credito di consumidor. Manera treci padilanti pa Gobernador actualmente e ley ta den implementacion unda ta bay crea tambe un sistema di registracion di credito. Banda di esaki pa proteha e consumidor a lansa un campaña di Educacion Financiero pa yuda finansas den hogarnan. Pa asisti den esaki lo fortifica e departamentonan concerni pa ta e voz y defensor di e derechonan di e consumidor.
E problemtica di finansas ta uno grandi den nos famianan. Pesey mes mi ta aplaudi e campaña aki. Nos mester sigui traha pa fortalece e fundeshi di nos famianan. Haci esaki mas fuerte y solido. Sigur den e situacion di reto continuo aki nos mester sigui enfoca riba nos famianan y un calidad di bida digno pa cada un di nan.