“Contratistanan chiquito cu entradanan margina y eherciendo trabaonan ehemplar merece un mihor trato y un entrada husto y completo”. Esaki tabata posición cu Líder di AVP mr. Mike Eman y su fraccion a tuma durante di reunión di Parlamento riba presupuesto di DOW.
Mr. Mike Eman a presenta un moción di su fraccion cu ta urgi gobierno pa mas liher posibel duna atencion na e preocupacionnan di e contratistanan chiquito y corigi e decisionnan aki cu ta perhudicando e contratistanan chiquito.
E moción aki, di fraccion di AVP, ta sali na defensa di e contratistanan chiquito cu contract di servicio cu DOW, SERLIMAR y Santa Rosa cu pa hopi aña ta haciendo un trabao grandi y importante di limpieza y mantencion rond di nos isla. Ta trata di mantencion di e bunitesa di nos flora, barionan y centronan di ciudad y trabaonan adicional pa cual tanto DOW, SERLIMAR y Santa Rosa ta utiliza nan servicio.
E discurso di e Líder di Fraccion di AVP y e moción a mustra cu compensacion y condicionnan di trabao di contratistanan chiquito ultimamente a conoce medidanan severo di Gabinete Wever Croes cu a afecta nan den un forma cu a perhudica nan nivel di entrada severamente, condicionnan di trabao y tambe nan seguridad di entrada mes.
Den su presentacion Eman a duna detayes di unda tur Gabinete Wever Croes a corta den e compensacion di e contratistanan chiquito.
Eman a mustra tambe cu banda di corta den nan entrada y compensacion e acumulacion di medidanan imponi tin un impacto directo ariba e costo di bida di e famia di e contratista chiquito, mescos cu den comunidad. Tambe e gastonan operacional diario di e contratistanan chiquito ta wordo confronta cu aumento severo di gastonan inevitabel pa por brinda servicio mientras cu e compensacion ta wordo corta. E ta mustra tambe cu ariba tur esaki awor ta bin aumento di prijs di awa y coriente cu 30%, paga pa remedi y aumento di BBO cu lo haci BBO en total 21% riba mayoria producto na Aruba.
Mr. Mike Eman ta bisa cu e mocion cu fraccion di AVP a presenta pa urgi gobierno pa mas liher posibel duna atencion na e preocupacionnan di e contratistanan chiquito y corigi e decisionnan aki cu ta perhudicando e contratistanan chiquito, lamentablemente a worde rechasa dor di coalicion MEP/RAIZ. Eman ta bisa cu lo sigui hiba e lucha, pasobra locual Gabinete Wever Croes ta haciendo cu e contratistanan chiquito ta hopi inhusto.
Banda di a corta den nan entrada y compensacion pa gastonan di operación nan tin cu biba tambe cu e aumento dramatico di costo di bida y di materiaal cu ta afecta nan gastonan familiar y gastonan di operación, e lider di AVP, mr. Mike Eman a splica.