Oranjestad – Aruba Sister Cities Association (OASCA) ta contento di por anuncia cu e Artista Contemporaneo, Nelson Gonzalez, Venezolano-Arubano, ta e ganado absoluto di e open call pa arte publico, organisa pa e gobierno di e Ciudad di Doral na Florida.
Migrante Monumento
Gonzalez ta basa su mes den un analisis entre e patrimonio monumental y su hendenan. E ta relaciona su piesa artistico cu e slogan di e ciudad y e formanan di ordo social. Ciudad di Doral ta conoci como e ciudad pa biba, hunga, studia y traha. E simbologia di e piesa di arte titula Migrante Monumento ta retrata e humanidad, e hende cu ta bin cu su idea den maleta y ta tiranan, manera nos tur a yega di traha avion di papel y tira nan pa wak con leu nan por yega.
Gonzalez su metodo di trabou, ta pa construi un brug simbolico y patrimonial cu tur e “sister-cities” di ciudad di Doral. Hunto cu tur inmigrante di e sur di Florida lo tin un monumento dedica na nan.
E arte publico ta duna importancia na e aeropuerto di Miami pa ciudad di Doral, un interactor economico y un entrada pa e migrante nan.
OASCA, ta sumamente contento di por ta parti di e momento historico na unda e monumento lo uni Oranjestad y Doral pa semper. Locual ta haci e momento mas special ainda ta e aporte y apoyo di tur e representantenan di “sister-cities” di Doral, e trahadornan di diferente departamentonan di e ciudad di Doral y tambe DORCAM Doral Contemporary Art Museum cu nan programanan di arte ta uni e comunidad.
Pueblo di Aruba por ta orguyoso di forma parti di un projecto internacional cu tin un balor historico y ta unico den su concepto.
Pa mas informacion tocante e projecto por bai riba www.migrante.art