Un Plataforma multi disciplinario cu lo brinda conscientisacion y prevencion den e centronan di cuido di mucha pa babynan di 6 siman pa 12 luna
ORANJESTAD– Siman pasa, Prome Minister Evelyn Wever-Croes y Minister di Asuntonan Social, Rocco Tjon a reuni cu e Plataforma “Platform Veiligheid in de Kinderopvang”, cu ta encarga pa crea un ambiente mas sigur di conscientisacion y prevencion den e centronan di cuido di mucha pa tur e babynan di 6 siman pa 12 luna.
Diferente organisacion riba tereno social, salud y cuido, cu ta kere den e tema “Ta tuma un comunidad pa lanta un mucha”, a uni y forma un Plataforma multi disciplinario, E Plataforma ta consisti di miembronan di entre otro, Directie Volksgezondheid/Jeugdgezondheidszorg, Stichting Wit Gele Kruis, Fundacion Pa Nos Muchanan, Stichting Rode Kruis, Ambulance y Departamento di Mucha y Hoben.
E Plataforma aki ta wordo presidi door di señora Noemi Maduro. Señora Noemi manera conoci, a pasa den un situacion na unda cu el a perde baby Noah. “Mi tin un respet pa señora Noemi kende a sa di haci uzo di su dolor y duele di e perde su baby pa yuda otronan pa no pasa den e mesun circumstancia”, Prome Minister a expresa.
Gobierno di Aruba for di e tempo ey, a duna su compromiso cu algo asina no mester pasa nunca mas. Pa e motibo aki, e iniciativa aki ta un iniciativa bon y positivo. E “Platform Veiligheid in de Kinderopvang”, den cooperacion cu Rotary Aruba y RBC, a logra pa traha e posternan y bukinan cu por wordo comparti cu tur e centronan di cuido di nos muchanan. “Mi ta haci un apelacion na tur esnan cu ta cuida di muchanan chikito. Nan ta asina hopi delicado y mester di hopi atencion. Ban duna tur di nos parti pa nos cuida nan y pa evita pa cualkier incidente pasa nan”.
Centronan di cuido hopi biaha kizas no ta ekipa cu tur informacion. Pa e motibo aki, tin fundacionnan, institutonan y e Plataforma aki cu ta cla pa yuda y duna un man pa haci centronan di cuido sigur y duna trankilidad na mayornan. “Ban haci uzo di e ayudo cu Gobierno y e plataforma aki ta brinda y percura cu loke cu a pasa cu baby Noah no pasa nunca mas”.
Prome Minister Evelyn Wever-Croes, Minister Rocco Tjon y tambe Presidente di Parlamento, señor Edgard Vrolijk a ricibi e poster di informacion cu lo wordo poni na tur centro di cuido di nos muchanan.
