E interes ta hopi grandi pa opleidingen nobo.
ORANJESTAD: Durante siman Minister Endy Croes hunto cu su conseheronan di Ministerio di Enseñansa a reuni cu staf di EPI tanto e Algemeen Directeur Sr. Ryan Maduro y Onderwijskundige Directeur Sra. Claudia Withfield riba varios topico pa asina e mandatario keda bon informa di tur desaroyonan. EPI ta un scol grandi di alrededor 1700 alumno. Manera nos sa EPI a, y ta pasando den innovacion y a modernisa 8 opleiding desde 2021-2022 y como tal e aña escolar aki 2022-2023 a inicia cu estudionan nobo. Minister Endy Croes a indica cu esaki sigur tin su retonan cune tanto pa staf, unit managers, begeleidende coordinators y docentenan den e proceso inicial cu nos ta aden. Pero unda tin boluntad y positivismo nos ta logra e obhetivonan na bienestar di e alumnonan. Pues esaki ta den pleno ehecucion na e momento aki. Tambe staf di EPI a splica cu inicialmente stuurgroep a calcula cu e cambionan aki cu ta inicia cu 22 opleiding (grupo) di 26 studiante pero door cu e ‘aanvraag’ ta asina halto por ehempel den opleiding nobo cu ta ICT e.o. a dicidi pa amplia. En total tin 29 grupo di 26 studiante cada un. Casi 600 studiante cu a inscribi pa e prome aña. Algun deficiencia cu ta trahando riba dje pa resolve den algun dia nos dilanti ta e falta di docente den cierto vaknan pa por cubri tur e lesnan y evita les ‘uitval’. Pa e siman entrante lo tin esaki pa 80% resolvi. Alabes a cubri algun inkietud cu ainda por tin. Pa loke ta trata material pa scol Minister Endy Croes a bay di acuerdo y a aloca fondo mesora pa esakinan y hasta un ‘bijbouw’ unda lo construi algun lokaal extra cu tabata riba planning. Finalisando e mandatario di Enseñansa a remarca cu tabata un bon reunion, manera semper ta e meta pa busca solucion y brinda e studiantenan e miho posibilidad den bida pa prepara y desaroya nan mes pa futuro.