Home Politics Parlamentario Darlaine Guedez-Erasmus (MEP): Parlamento di Aruba ta conta cu un...

Parlamentario Darlaine Guedez-Erasmus (MEP): Parlamento di Aruba ta conta cu un siman hopi importante 

SHARE

 

 

Den e siman aki cuminsando di dialuna 12 di september 2022 tabatin votacion pa presidente y vice-presidente di Parlamento pa aña 2022- 2023. Como presidente di Parlamento a reeligi sr. Edgard Vrolijk y vice-presidente Sr. Raymond Kamperveen. Diamars 13 di september 2022 tabata aña parlamentario 2022 – 2023. Tur aña riba e di dos diamars di september e aña parlamentario nobo ta tuma luga. Esaki ta e di 37 Aña Parlamentario di Pais Aruba y e ta un momento hopi solemne pa e organo di mas importante di Pais Aruba.

Na e apertura Gobernador di Aruba, Su Excelencia sr. Alfonso Boekhoudt a duna un bon discurso den cual el a repasa e retonan cu Aruba ta pasando aden y su vision y bista pa futuro di kico tur ta spera nos. Algo special tambe ta cu Gobernador a pone hopi atencion na e parti humano cu ta hopi importante den nos bida y pa nos pais.

Danki na Gobierno di Aruba y invitadonan cu tabata presente na e bunita ceremonia di aña parlamentario 2022 – 2023. Mi kier felicita y desea Sr. presidente Edgard Vrolijk y Sr. vice-presidente Raymond Kamperveen hopi exito y alabes mi kier desea mi coleganan parlamentario hopi sabiduria pa tuma e miho decisionnan encuanto leynan cu tin cu wordo trata den aña parlamentario 2022 – 2023 y traha den union pa sigui den un rumbo positivo pa brinda progreso y bienestar pa tur ciudadano riba Aruba.