Home Politics Parlamentario Marco Berlis (MEP): Pa di 5 luna consecutivo nos tin...

Parlamentario Marco Berlis (MEP): Pa di 5 luna consecutivo nos tin un luna record den turismo! 

SHARE

 

Aruba ta bendiciona cu un fluho di turismo fuerte, dedicacion y amabilidad di nos trahadornan y bon trabou di nos gobierno y profesionalnan. 

 

Augustus 2022 a conoce otro luna record den turismo compara cu 2019. Ta compara resultadonan di 2022 cu 2019, pasobra esaki anteriormente tabata e aña record pa nos turismo. Compara cu 2019 nos a recupera 105% di nos turismo, cu ta un logro enorme, considerando cu esaki ta pasando pa 5 luna consecutivo caba! Esaki ta significa cu nos pais y nos empresanan local ta cosechando mas y nos economia por recupera mas liher pasobra tin mas entrada cu ta drenta e caha di gobierno. Esaki sigur lo sigui yuda baha e deficit y por habri porta pa inversionnan den futuro, den nos pais. 

 

E Mercado di Merca, cu ta nos mercado principal di turismo, a conoce un recuperacion di 110%. Nos sa tambe cu e mericanonan ta esunan cu mas gusta gasta placa y diberti nan mes riba nos isla y asina ta haci cu e economia ta drei bon pa hopi empresanan cu ta dependiente di turismo. E total di Stay-Over Arrivals pa Augustus 2022 tambe a conoce un subida basta grandi di 4.9%.  Mester subraya cu e bon trabao y vision di gobierno, specialmente Minister Dangui Oduber y profesionalnan den e sector di turismo ta cosechando grandemente di nan labornan intenso y di un vision bon dirigi. Ademas, ATA recientemente a anuncia cu nan lo expande nan horizonte door di cuminsa conecta cu mercadonan nobo y prometedor pa nos isla y trata na atrae mas turistanan di e nacionan aki. Esey sigur ta hopi bon noticia pa nos pueblo. Mas nos diversifica nos mercado turistico, mas nos ta fortifica nos unico pilar economico.

 

Si nos por mantene e progreso enorme aki pa un bon tempo, esaki sigur lo tin su efectonan positivo pa nos pais y nos pueblo. Cu nos esfuerso, dedicacion y enfoke diario na nos trabao y vision, hunto nos lo logra recupera hopi mas liher. Hunto nos a drenta e crisis di Covid, pero tambe hunto nos lo sali for di dje y conoce mihor temponan pa nos pais Aruba.

 

Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!