Dia 8 di september 2022, Instituto Biba Saludabel y Activo, IBiSA durante conferencia di prensa a lansa su website nobo pa henter pueblo di Aruba.
Den e conferencia di prensa aki, a hiba palabra Sr. Edgar Erasmus di management team di IBiSA y tambe Sr. William Erasmus cu ta hefe di departamento di desaroyo na IBiSA.
Sr. Edgar Erasmus:
Sr. Edgar Erasmus den e conferencia aki a bisa cu meta di e website aki ta pa comparti tur actividad di IBiSA cu comunidad di Aruba pa asina keda informa di esakinan, cual website yama www.ibisa.aw.
Tambe riba e website aki por haya parti di historia, caminda ta conta cu prome cu IBiSA tabata tin un “sportbureau” cu a inicia na aña 1976 y cu despues na aña 1981 a cambia pa Instituto pa Deporte, Educacion Fisico Recreacion, miho conoci como IDEFRE.
Riba website por wak tur actividad y calendar di “Schoolsport”, caredanan y salud. Tambe por wak bek e resultadonan di actividadnan cu a tuma luga y cu ta bay tuma luga tanto pa mucha y hende grandi.
Pa esnan cu mester di servicio di IBiSA tambe por haya informacion di esaki riba e website caminda nan por haci peticion pa presta material of ayudo pa cu actividadnan di deporte, actividad fisico y charla di salud.
Y pa esnan cu ta busca informacion di federacionnan deportivo, tambe por haya esakinan riba e website di IBiSA di esnan cu a manda nan informacion pa IBiSA, e federacion nan cu no a haci esaki, por haci esaki ainda.
William Erasmus:
Sr. William Erasmus durante conferencia di prensa a elabora cu tin diferente “tabs” den e website caminda por haya informacion di diferente actividad fisico y deportivo.
Tambe den website por haya sa tambe di tur e departamentonan cu IBiSA tin, por ehemepl deporte escolar y recreacion, tambe tin desaroyo deportivo (sport development), caminda por haya sa tur loke ta pasando, si ta bay tin lectura, actividad den bario, cua actividad tin pa mucha, hoben y tambe adulto.
Tambe tin un “tab” di IBiSA San Nicolaas cu ta maneha tur actividadnan cu tin pariba di brug, den e parti aki por haya sa di tur actividad nan cu ta wordo organisa na IBiSA San Nicolaas.
Tambe tin un “tab”, cu ta dedica na salud, aki por haya tur informacion di departamento di salud y tambe tur locual cu ta wordo promovi pa departamento di salud, aki por haya diferente folders, con pa come saludabel, y hiba un biba saludabel.
Otro departamento cu tambe ta riba e website aki ta departamento di comunicacion (PR), aki por haya tur noticia di actividadnan cu ta na caminda y esnan cu a pasa, por haya tambe galeria di potretnan di actividadnan cu a tuma luga caba.
Tambe tin un “tab” caminda por haya e caledario di IBiSA tanto pa mucha y hende grandi, tur hende por bay riba e calender aki y wak tur locual lo bay tuma luga.
Mester menciona tambe cu ainda e website ta den desaroyo y lo keda amplia durante e lunanan binidero.
Pa mas informacion por bishita e website di www.ibisa.aw