Home Politics Parlamentario Marco Berlis (MEP) – PART 1: Benny Sevinger ademas di sospechoso...

Parlamentario Marco Berlis (MEP) – PART 1: Benny Sevinger ademas di sospechoso awor tambe ta gana e titulo di stempel minister

SHARE

Benny no sa nada, e no ta corda nada y ora Hues a puntra Benny si e tabata manera ‘un stempel machine’ el a contesta cu si!

Dia 7 di September e prome dia di e caso di Benny Sevinger a tuma lugar. Un dia den cual hopi hechonan di corupcion y soborno tabata evidente. Hues a puntra Benny con e procedura tabata na DIP pa erfpacht, dus si bo tin cu meld na DIP, si tin condicionnan aplicabel y pa despues akkoord verklaren. Benny a bisa cu e tabata firma tur cos ‘dezerzijds geen bezwaar’. Hues a comenta cu pa e trahadornan di DIP, nan tabata considera cada documento cu Benny tabata firma dezerzijds akkoord como un opdracht di e ex minister, sinembargo Benny a contesta cu DIP mester a haci su trabao. E ora hues a puntra Benny si e tabata manera ‘un stempel machine’ y Benny a contesta cu si. Un Benny cu ta gusta tuma su tempo pa yama coalicion stempel parlament, awo ta wordo yama pa Hues un Stempel Minister, cual declaracion el a bay di acuerdo cu ne. Remarcabel ta tambe cu diripiente e no sa nada. E no sa di ken e terenonan ta, cuanto a paga pa nan, kende e dun’e donacion, cuanto placa el a ricibi, ki tempo el a ricibi’e, e no ta reconoce niun hende mas, diripiente Benny a perde memoria di tur cos. Por ta e ta kere cu Hues lo guli e “stempel” ey! Aki ta sigui algun hechonan di e caso;

Hues a remarca cu OM a haya documentonan, firma cu ‘dezerzijds akkoord’ cu no tabata registra na DIP, Hues a puntra Benny dicon y e no por a contesta!
Sr. Harms tabata haci donacionan gigante den cientos di miles di florin na Benny. Ora cu Harms tabata kier un tereno den centro di ciudad pa construi un hotel, Harms ta confirma cu e ora ey SI Benny tabata sa di e peticion. Kiermen Benny tabata ta un stempel minister pa tur peticion di tereno, menos esnan cu tabata significa cientos di miles di florin pe den “donacion.” Di eseynan si e tabata tin un bon conocimiento pasobra e mester a fixnan pe donacionnan ricibi.
Hues a puntra Harms cual partidonan e ta sponser. Harms a confirma cu ta AVP so e ta sponser y cu e la sponser Benny 100.000 florin. Tabata tin un donacion despues di campaña tambe!
Despues di presenta e prome hecho, Fiscal a pasa pa hecho number 2 cu ta referi na Harms cu a saca probecho y ganashi cu e benta di e terenonan erfpacht of opties door di soborna Benny.

Cos ta teribelmente diferente ora bo no ta para mas den Parlamento, unda bo ta onschendbaar y bo por grita yen barbaridad, gaña, manipula, rebaha, insulta y hunga invencibel manera bo kier. Pero aworaki ni bo arogancia ni bo orguyo no ta bay scapa bo, si berdad bo ta culpabel! Bo a grita cu niun hende por saca bo for di Parlamento! Berdad, pero si tur loke bo a wordo acusa di dje riba e prome dia caba a laga bo mudo, ta bo mes fechorianan lo saca bo for di Parlamento!

Keda pendiente pa mas informacion, pasobra tin hopi mas hechonan fuerte presenta den corte cu lo mi elabora riba dje den otro articulonan.

Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!