E siman cu a pasa nos pais a pasa den un berguensa hamas visto den su historia y un vez mas debi na e maneho coruptivo y di ladronicia di AVP. Den pasado nos tur por corda e caso di corupcion grandisimo den Fondo Desaroyo Nobo San Nicolas na unda e ex-lider di AVP, Tico Croes tabata envolvi, sigui pa e caso Ibis y como acusado principal ex-minister di AVP, Paul Croes. Y awe na 2022 nos pais ta ser confronta cu otro Mega caso Avestruz caminda parlamentario di AVP, Benny Sevinger ta e protagonista y acusado principal den tur e bagamunderia y ladronicianan cu tereno di pueblo.
Donacion of corupcion?
Hecho ta cu siman pasa e pueblo Arubano no por a kere su oreanan ora di scucha un parti chikito so di tur e acusacionnan grave contra Benny Sevinger y su compinchinan den Corte. Loke a resalta ta cu hopi tereno di gobierno a wordo duna a cambio di sumanan cuantioso na e pandiya di Benny y AVP, sumanan cu ta varia entre 50 mil florin pa 100 mil florin y te hasta un suma di mas di 2 miyon florin di placa cu a ser scondi na Corsou. Tur e sumannan aki y mas tabata pa supuesto donacion pa campaña pa eleccion di Benny y AVP. Pueblo por imagina cu un solo comerciante grandi Harms a regala 100 mil florin na Benny Sevinger? Tambe con un otro comerciante grandi Lowestein a regala 50 mil florin y pago pa fiesta di cumpleaños di yiu di Benny Sevinger. Ta increibel con henter e pandiya di Benny Sevinger a abusa di e confiansa di pueblo y a hiba un politica di ‘con cu bay laga bay, ta nos ta manda toch’.
MEP ta busca fondo den pueblo
Contrario na e triki di donacionnan cuantioso aki na un solo candidato di AVP y miyones di florin mas na e demas 28 candidatonan di AVP, den partido MEP ta hopi lucha y sacrificio cada candidato mester haci pa por logra haya algun mil florin bendiendo barbecue, koffiemorgen y rifa y partido MEP mes cu den varios aña mester tene varios rifa di auto y placa, bingo, pa acumula cierto suma for di e pueblo pa por yuda financia campaña di partido.
Mirando tur e sumanan envolvi den e caso escandoloso di Benny y su compinchinan, e pregunta ta surgi cu si esaki tabata e motibo cu AVP a gana e eleccion di 2013 ‘landslide’ cu 13 asiento, caminda na ceramento di e campaña e anochi ey nan a organisa un Carnaval super luhoso y miyonario den cayanan di Oranjestad cu musica di 13 banda musical. No por ta otro ya cu nan maneho financiero e tempo ey tabata desastroso cu mas di 400 miyon florin di deficit pa aña.
Engaño total
Si bo wak bon, te cu awo e acusacionnan contra Benny ta envolvi sumanan grandi procedente di comerciantenan grandi caminda Benny tabata wheel and deal cu nan na grandi y pa despues den Corte e declara na grandi cu e no sa net nada di placa y e no ta give a damn pa haya sa tampoco. Tambe compinchinan yega na cas di partido AVP a ricibi terenonan grandi (90 mil Bisa mi) y caminda placa a core manera riu den henter Cas di partido den Rancho. Hecho ta cu Benny Sevinger mes no a give a damn pa yuda cualkier ciudadano humilde cu un pida tereno di sikiera 400 m2. Tur e ciudadanonan aki a ser engaña pa Shon Benny cu un firma falso y caminda e ta skirbi riba e peticion cu e no tin ningun obheccion pa e ciudadano aki haya un pida tereno. Pero ta te ey tambe henter su show y fantasia a keda. E ciudadano humilde no a logra haya ningun tereno for di Benny ni for di DIP, pero Benny si a logra sigura miles di voto pa su mes y su partido.
Awo nos ta na apenas e prome siman di e caso di Avestruz den Corte y ta falta como 4 luna mas di tratamento di e caso y pa finalmente e sentencia cay na januari 2023.
Partido MEP lo keda tene pueblo na altura di henter e desaroyo di e caso aki y p’asina pueblo mes por ta testigo cu hamas lo mester confia partido AVP den gobernacion di e pais aki. After all, no mester laga pushi nunca cuida pisca.
