Caya Papa Juan Pablo II/ ex- Rondweg, Dakota.
Diasabra algun minuut despues di mey anochi, a sosode un accident hopi serio den Caya Papa Juan Pablo II, ex Rondweg.
Un Mitsubishi Pajero RHD, pa un of otro motibo e chauffeur a perde control ariba e auto, e ta subi acera y dal contra un troncon di un mata di kwihi hopi grandi. Esaki a sosode net na e T kruising cu Awacatistraat.
E impacto tabata uno hopi fuerte mes, debi cu e chauffeur a kibra e stuurwiel cu su pecho. Di of otro manera e chauffeur a sali for di e auto y a bay drumi riba e acera. E tabata tur na sanger y tabata keha di hopi dolor. Tambe e tabata keha di hopi sed y tabata pidi awa locual no a wordo duna na dj’e.
Polisnan cu a yega prome na e sitio tabata trata na papia cu ne y bise pa e keda trankil, mientras tabata wardando riba yegada di ambulance cu urgencia. Lamentabel ta cu e agentenan mucho nan no por haci y solamente por consola e victima den tur su dolor wardando ariba e ambulance.
Despues cu e paramediconan di ambulance a yega na e sitio, nan a trata e victima y cu urgencia a transport’e pa hospitaal.
Mirando e gravedad di e accidente e specialista di trafico na e sitio a pidi pa departamento tecnico di polis bin na e sitio pa haci mas investigacion. E Mitsubishi Pajero a wordo confisca pa motibo cu su papelnan no tabata na ordo.
