Home » Fiscal a exigi 9 luna di prison pa dos agente polis

Fiscal a exigi 9 luna di prison pa dos agente polis

by Admin
0 comment 96 views
ORANJESTAD – Awe mainta e agentenan di Polis, G.D. y E.d.M. a presenta den Corte pa e caso penal cu Ministerio Publico a cuminsa contra nan.

ARUBANATIVE por a compronde cu Fiscal ta haya tanto d.M. como D. culpable di a duna informacion secreto di Polis y a viola reglanan di Polis. Abogadonan mr. Illes y mr. Arendsz Marchena a cuestiona e forma con ta persigui e dos agentenan aki, siendo cu nan no a haci nada contra reglanan di trabao y mucho menos duna informacion di Polis na otro persona.

FISCAL DI CURACAO A TRATA CASO

Un Fiscal di Curacao a bin Aruba pa trata e caso aki. El a acusa d.M. y D. di malversacion entre April 2018 y November 2018. Tambe Fiscal ta acusa e duo cu riba 12 Augustus 2018 a duna informacion di Polis na e dama T. y cu a viola reglanan di Polis. Segun Fiscal, e duo lo a duna informacion di traficacion di droga y unda esakinan tabata na e dama T. Tambe di lo a haya placa for di e dama T. pa suministra informacion. Fiscal ta haya cu d.M. y D. a abusa di nan posicion como Polis. Tratamento di e caso a dura di mainta te den oranan di merdia.

Hues a mustra cu e caso ta bay tocante contactnan cu d.M. tabatin cu e dama T. via cellular. Ta asina cu ta sospecha e dama T. di ta meti den dos caso di traficacion di droga. 7 April 2018, Guarda Costa a intercepta e boto El Original cu droga y bala cayente. 11 April 2018, e dama T. ta presenta na oficina di Recherche (UGC)caminda el a pidi pa papia cu e agente B. Door cu B. no tabata tey, d.M. cu ta sinta den e mesun oficina a bay atende.

AGENTENAN DISGUSTA

Na dado momento Hues a puntra e agentenan, kico nan ta pensa di e acusacionnan. D. a bisa Hues cu e ta desapunta cu maneho di Fiscal y Cuerpo Policial pa e forma con atende cu Toppenberg. Haya cu a usa Toppenberg pa soluciona caso. E otro agente d.M. ta haya cu e ta inocente y cu ningun di e acusacionnan no ta berdad.

E agente d. M. a splica Hues cu na dado momente autoridad a perde pista di T. E ora ey e agente D. a bin cu e idea pa busca un carchi di cellular y hinca den un cellular cu tin na oficina. Ta asina cu na Augustus 2018 a busca carchi pa hinca den un cellular pasobra T. a yama d.M. y puntra di e ta wordo busca y pakico tin autonan ta vigil’e. E agente d.M. a bisa T. cu e no ta wordo busca y pa manda potret di e autonan. El a duna e number di e cellular. A constata cu e number cu T. tabata usa ta di Colombia. A resulta cu e enberdad e potretnan ta di auto cu e unidad di vigilancia ta usa. Segun d.M., T. a informa di diferente traficacion cu lo mester a tuma lugar y nan a informa e departamentonan concerni.

A resulta cu e cellular cu d M. a usa, ta procedente di un secuestro di un persona caminda e cellular a wordo horta. Pero no tin ningun informacion riba esaki.

Ta asina cu actualmente d.M. ta trahando na un otro departamento di Polis y D. tambe.

FISCAL A EXIGI 9 LUNA DI PRISON

Fiscal ta haya legalmente proba cu d.M. y D. ta culpable di a malversa e cellular cu ta di Cuerpo Policial, a pasa informacion na T. y tabata usa T. como informante. Esakinan ta contra reglanan di trabao. El a exigi 9 luna di prison pa ambos, di cual 3 luna ta condicional cu un tempo di prueba di 2 aña.

ABOGADO

Abogadonan mr. Illes di D. y mr. Arendsz Marchena di d. M., a cuestiona e forma con ta persigui nan clientenan siendo cu nan tabata haciendo un tremendo trabao. Nan a mustra cu e Fiscal cu a traha un raport contra e duo, despues ta elogia e duo y a bisa cu e ta duna cu realmente nan a wordo cumpra sino mas bien tabata busca pa saca informacion di T. E abogadonan ta haya cu nan cliente ta inocente y cu Hues mester declara nan liber.

Hues a bisa cu e ta bay studia e caso y dentro di algun siman lo por spera sentencia.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio