Home » Porta di Logianan ta dal habri pa publico: ‘DIA DI MASONERIA’ RIBA DIASABRA 10 DI SEPTEMBER 2022

Porta di Logianan ta dal habri pa publico: ‘DIA DI MASONERIA’ RIBA DIASABRA 10 DI SEPTEMBER 2022

by Admin
0 comment 136 views

Oranjestad : E “Orde van Vrijmetselaren in Nederland” of Ordo di Masonnan Hulandes ta declara diasabra 10 di september como e “Dia Nacional di Masoneria” na Aruba. Ya desde un cantidad di aña e masonnan hulandes a desea di trece mas claridad riba nan actividadnan. P’esey cu riba diasabra 10 di september 2022 durante e ‘Dia di Masoneria’ tur Logia Hulandes ta habri nan portanan pa publico en general. Na Aruba tin tres Logia Hulandes: “El Sol Naciente” – “Lodge King Solomon” –“The Middle Chamber” y tambe un Logia Venezolano – “Hiram”. Pa esnan interesa e ta un oportunidad unico pa sera conoci cu Masoneria, e biaha aki tur e logianan di Aruba lo ta represente na e edificio di Logia “King Solomon” situa na Dadelstraat # 27, Dakota.

 

E Orden Hulandes di Masoneria un biaha mas ta dal portanan habri y tambe aki na Aruba tur Logia a dicidi di haci esaki. Hopi hende conoce e palabra Mason, pero masha poco hende sa kico ta su contenido. Of nan tin un perspectiva completamente robes di dje. Ta eynan e hermandad kier trece cambio y ta p’esey a institui e Dia di Masoneria. Tur aña desde aña 2012 riba e di dos diasabra den September tin e asina yama Dia di Masoneria na Aruba. Diasabra venidero 10 di september ta bay tin un “open house”. Na Aruba e ta bay ta na Logia “King Solomon” na Dakota (si ta bin di Playa direccion retonde Tarabana ta tuma direccion man drechi pa drenta Dakota via Dadelstraat, Logia King Solomon ta keda na bo man drechi, edificio beige).

Masoneria ta pa profundisa den spiritualidad. Asina un hende ta siña conoce su mes mas mihor, p’asina e persona por aporta den construccion di un miho comunidad. “Mehora mundo pero cuminsa cu Bo mes”, por ta e slogan tambe. Masoneria ta reconoce e balor inmenso di e personalidad humano, e igualdad di tur ser humano, e derecho di cada ser pa independientemente busca e berdad y tur hende su responsabilidad pa su mesun actuacion pa haci of no.

 

  • Transicion – desaroyo – ta esencial den Masoneria. E caminda pa mehora Bo mes, pa e Mason ta e caminda of e viahe simbolico pa e Luz. Masoneria ta kere cu cada ken na su manera sa cu tin mas cos entre Tera y shelo cu ta move humanidad, un asina yama principio superior. Cada Mason ta liber pa segun su mesun bista pa completa esaki y pon’e manera cu e ta desea. Esun ta kere den un Dios, e otro den e combinacion di forsa di naturalesa y e otro den e supremo den su mes of den su consenshi. Ata otro ta un Budista.
  • Masoneria pues no ta un religion, pero un hermandad basa riba spiritualidad y moralidad.

Bo ta interesa den Masoneria? E portanan di Logia “King Solomon” ta hancho habri riba diasabra 10 di september durante e “Dia di Masoneria” di 10:00 am pa 13:00 pm. Pa mas informacion wak e website www.dagvandevrijmetselarij.nl y http://www.vrijmetselarij.nl/

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio