Home Politics Parlamentario Setty Christiaans-Yarzagaray kier a felicita Animal Welfare Alliance Aruba cu a...

Parlamentario Setty Christiaans-Yarzagaray kier a felicita Animal Welfare Alliance Aruba cu a ricibi e donacion di US 40 mil door di ta un di e 10 nominadonan durante e actividad organisa pa Wind Creek Aruba, Long Table

SHARE

Como fraccion a dicidi di duna sosten na e actividad di Long Table mirando e meta di e actividad aki cu ta uno pa genera entrada pa donacion na un lista di instancianan caricativo cu tin e posibilidad di bira un nominado basa riba voto di comunidad. Di e lista di instancia, 10 diferente instancia a wordo nomina y di e 10 instancianan a scohe e 6 nan cu mas voto unda cu tawata tin un ganador por medio di voto.

E ganador a resulta di ta Animal Welfare Alliance Aruba cu ta un union entre Luna Foundation, Nine Lives Aruba Foundation, Sgt. Pepper’s Friends, United Dogs Aruba Fountation y Crijojo Trappers unda cu tur ta organisacionnan di rescate di tanto cacho y pushi riba caya. Trahando hunto nan a logra y tin e meta pa sigui cu trabounan di sterilisacion di cacho y pushi pero tambe conscientisacion y educacion di cuido di nos animalnan. E organisacionnan aki ta kere cu esaki por ta e solucion di e problema grandi di multiplicasion iresponsable di cacho y pushi riba caya y na Aruba. Nan intencion ta pa yega na un clinica nonprofit pa sterlisacion di pushi y cacho na Aruba den e comunidad di menos recurso.

Lesando e meta di e 5 organisacionnan aki pakico nan uni y como un persona cu tambe ta traha den tempo liber na bienestar di cacho y pushi riba caya mesora a dicidi di sostene Animal Welfare Alliance Aruba durante e actividad di Long Table.

Logico ta felicita y gradici tambe Wind Creek pa organisa e evento aki pa di 4 biaha caba cu un meta asina bunita di aporta na organisacionnan na Aruba cu ta traha cu caracter caritativo. Ademas di Animal Welfare Alliance Aruba, ta felicita e otro 5 organisacionnan tambe cu a ricibi e gesto di $10 mil donacion di Wind Creek como un nominado den mas di 40 organisacion. Mester bisa cu ademas di e placa genera door di e compra di carchi di e mil participante, Wind Creek a haci donacion adicional na e otro 5 nominadonan cu ta di aplaudi.

No ta keda nada otro cu desea Animal Welfare Alliance Aruba y tur otro organisacion cu ta traha na bienestar di nos animalnan na Aruba hopi exito cu boso meta comun y hopi forsa pa e trabounan dificil na purba resolve e problema aki di cacho y pushi riba caya na Aruba. Por imagina caba cuanto animal por ricibi sterilisacion y cuanto cacho y pushi menos lo por tin riba caya danki na boso esfuersonan.