Gasto di huur ta subi tur aña cu indexering den prijs stipula den contract cu SOGA
Finansa publico ta un asunto serio y materia complica. Esaki ta keda demostra awe atrobe ora Parlamentario y ex Prome Minister Eman a purba bruha tera pa malinforma Pueblo bisando cu CAFT ta bisa na mas ocasion, pero e consehonan aki no ta wordo sigui simplemente pa sigui cu paga pa Friends and Family. Bisando esaki Sr. Eman ta bolbe mustra cu e no ta compronde finansa publico y kier sigui fomenta discordia cu mentira djies pa por yega na poder pa bolbe deshaci y desgracia Aruba cu mas debe.
Si Parlamentario Eman a tuma tempo pa haci su trabou debidamente, lo ela ripara cu tur contract cu tin pa huur cu edificio di Stichting Onroerend Goed Aruba SOGA tin un clausula pa indexa e prijs di huur tur aña. Pues tur huur pa edificionan di MFA, Warda di Polis na Shaba y Macuarima, edificionan di INFRA, BELFIN y JFK ta subi cada aña conforme e contract cu a wordo firma. No ta huur nobo a wordo cera cerca niun hende conoci como Friends & Family. Hasta e contractnan caro di e MFAnan, ta Mike Eman mes a bay pone prome piedra y corta sinta pa nan y awe diripiente e no sa mas kico ela firma. Ta lamentabel pa mira cu e sed di Mike Eman pa yega na poder ta bolbe pone e Parlamentario purba tuma Pueblo haci cu mal informacion. Ta mescos ela haci ora cu ela gaña Pueblo cu elo elimina BBO y a bira yega na poder, hisa BBO, probecha di e placa di BBO di Valero y bira redobla e debe di Aruba cu mas di 2000 miyon florin den apenas 4 aña.
Gobierno ta publica informacion financiero tur kwartaal y den esaki Parlamento, Pueblo, CAFT y tur interesa por mira tur entrada y gastonan haci pa Gobierno. Si sr. Eman a tuma tempo pa haci e trabou Parlamentario cu Pueblo ta paga pa e haci, y si ela lesa e informacion di tur kwartaal, elo no por a bin bolbe manipula y gaña Pueblo. E ta keda un situacion hopi tristo pa mira un hende grandi scapa, Parlamentario y ex Prome Minister di Aruba recuri na un politica asina barata pa tapa su incapacidad como representante y gobernante di nos Pais.
