Dialuna 29 di September 2022 Minister Glenbert Croes conhuntamente cu Utilities, WEB y ELMAR a anuncia inicio di e proceso pa yega na un parke nobo di molina di biento. E parke aki ta keda realisa den cuadro di e vision y maneho di energia di Gobierno di Aruba. Un vision cu por cierto ta keda carga pa tur stakeholders contrario na esun irealistico cu tanto show AVP a y ta haci cu ne. Meta di e proyecto aki ta pa sigui transforma Aruba su dependencia riba crudo HFO y switch pa un energia duradero, sostenibel, limpi y principalmente pagabel pa nos pueblo.
Nos por premira cu e sector di energia ta bay yuda na e meta asina importante cu semper nos tabatin, esta diversificacion di nos economia. No solamente e sector di energia ta bay diversifica nos economia, pero tambe ta bay crea mas cupo di trabou y loke ta asina crucial pa nos na e momentonan aki, e ta bay crea mas progreso pa nos pais. Den pasado na mas cu un ocacion mi a vocifera mi opinion contra e plannan di AVP contra e parke di Molina na Urirama. Nunca mi tabata contra e parke riba su mes pero si contra e localidad di ehecucion presenta.
Mi ta sostene Minister Glenbert Croes su exprecion cu na e momentonan aki nos ta para dilanti desicionnan crucial cu mester wordo tuma, pa salba no solamente nos economia pero na mes momento nos mester percura pa tuma decisionnan necesario pa salba nos planeta. Mirando nos situacion actual despues di e pandemia y e impacto di e guera, nos mester tuma decisionnan cu miras pa futuro y trata mas cu por na minimalisa nos grado di dependencia riba diferente tereno. Mas cu claro teniendo debido cuenta cu e efectonan devastador cu e cambio climatico tin den un cantidad di pais rond mundo cu ta influencia mundo y sigur anos como un isla chikito gravemente.
Segun IMF Aruba ta un di e paisnan cu mas a keda afecta economicamente debi cu ta solamente un pilar economico nos tin, cual ta turismo. Afortunadamente Gobierno di Aruba tin su plan nacional di energia cual ta inclui reduci dependencia di HFO y expande nos capacidad pa produci mas usando e.o. mas energia limpi. E desaroyo aki sigur lo brinda oportunidad nobo na Aruba pa diversifica nos economia. Algo sumamente importante, necesario y di gran balor.
Vision di energia di MEP ta uno realistico y efectivo y den pasado ya a demostra cu e ta existoso. Ya na aña 2008 Gobierno di MEP a dal e prome paso pa Aruba construi su prome Parke di Molina na Vader Piet. Na aña 2009 el a drenta den funcion produciendo 30 Megawatt di coriente cual ta bon pa 16 % di e total di capacidad di coriente cu Aruba tin mester.
Pa e siguiente añanan Utilities Aruba hunto cu WEB y ELMAR lo tin e tarea pa ehecuta e plan nacional di energia di Gobierno pa logra cu nos mes ta produci 45 pa 50 % di nos energia; cual lo ta limpi, renobabel y pagabel. Na mi opinion e meta na tur momento mester keda pa logra y mantene un prijs mas abou y stabiel pa nos hendenan teniendo na mes momento debido cuenta. cu nos economia, salud y nos planeta. Pesey e anuncio haci pa Gobierno dialuna ultimo ta uno grandi y balioso.